Oqaatsinik oqallinneq neriorsuinerlu unitsissigit
Aatsitassanik piginnittussaaneq aamma oqaatsit pillugit nippaalluni oqallinneq pissusissamisuunngilaq, ataataasoq taassumalu ernera ukiut tallimassaanik Nuummi angerlarsimaffeqanngitsutut inuusinnaappata. Titartaasartup Robert Holmenep Kalaallit Nunaanni politikerinit suut pingaarnerutinneqarnersut tupigusuutigaa
Atuartartut 90-it Robert Holmenep facebookikkut oqaaseqaataa nuannaralugu "synes godt om" toorsimavaat. Oqaaseqaat politikkerinik pissaaneqartunillu sakkortuumik appisaluussinerusoq politikerit sunik pingaarnersiuititsinissaat pillugit.
Taassuma politikerit appisaluuppai pissutigalugu ataataasoq taassumallu ernera arfinilinnik ukiulik ukiuni tallimani aqqusinermi najugaqarsinnaammata. Allaaserisaq aviisimi AG-mi sapaatip-akunnerani uani saqqummersinneqartoq.
- Allaaserisaq atuarakkut toqqusassisutut misigaanga. Nunatsinniuna susoqartoq? Meeqqanut asanartunut sisamanut ataataasutut - taakkunannga ataatsimik nukappiaraateqarpunga allaaserisami pineqartup ukioqataanik. Qanoq isilluni taamannak inuusoqarsinnaanera akuerineqarsinnaagami?, Robert Holmene aperaaq, taanna isumaqarpoq politikerit imminnut tunngasunik pisoqartillugu suliniapallattartut. Namminersorlutik oqartussani allaffeqarfiit oqummik eqqorneqarnerat assersuutitut taavaa.
- Politikerit imminnut siulliuttarnerat pillugu kamappunga. Namminersorlutik oqartussat allaffeqarfissuanni oqoqarnera paasineqarmat sukkanerpaamik allamut nuuttoqarpoq illoqarfimmi allaffeqarfinnik attartornikkut - tamakkua qaammammut qanoq akeqarsimanersut takorloorsinnaanngilara. Kisianni nukappiarannguaq arfinilinnik ukiulik opgangini qiianaqisumi sinitsinneqarsinnaavoq, akuerineqarluni! F... oqaatsit pillugit oqallinnisi qineqqusaarlusilu neriorsuutisi suugamik!! Imatut atugaqartoqartariaqanngikkaluarpoq, taanna allappoq.
Aviisip AG'p pisoq sapaatip-akunnerata tulliani sammeqqissavaa.