Tuusi: Oqaatsit pillugit oqallinneq atorneqarpallaalerpoq

IA-mi naalakkersuinermik suliaqarunnaartussap Josef Motzfeldtip kajumissaarutigaa oqaatsit pillugit oqallinnermi nikassaaneruinnanngitsumik pissusaqartarnissarput

IA-mi naalakkersuinermik suliaqarunnaartussap Josef Motzfeldtip kajumissaarutigaa oqaatsit pillugit oqallinnermi nikassaaneruinnanngitsumik pissusaqartarnissarput. Assi: Leiff Josefsen

- Oqaatsit pillugit oqallinneq atorneqarpallaalerpoq, eqqartugassaq sunaluunniit qaqinneqaraluaraangat oqallinnermi oqaatsit ilanngunneqartuaannarput – amerlasuutigut aningaasaqarnikkut naalakkersuisoqarnikkullu namminiilivinnissamut ineriartornissaq eqqarsaatigalugu eqqartorneqartussatut pingaarutillit pilliutigalugit oqaatsit eqqartorneqalersarput.

Taama oqarpoq IA-miit naalakkersuinermik suliaqarunnaalersussaq maannakkullu Inatsisartut siulittaasuat Josef Motzfeldt.

- Inuiaqatigiit aaqqissuussaanerat eqqarsaatigalugu inuiaqatigiinni allanngoriartornerup qiterpiaanniinnerput tappiilliorfigisariaqanngikkaluarparput.

Oqallinnernik allanik sangutitsiniutaassanngilaq
- Oqaatsivut pigaavut, atorpavut, illersorlugit ineriartortillugillu. Kisiannili ima isumaqanngilaq oqallinnernut tamanut pingaarnertut qulequtarineqassasut imaluunniit oqallinnernik tamanik allamut saatsitsiniutitut atorneqassasut. Inussiarnersumik oqallinnermut peqataasut tamaasa qinnuigissavakka suliassat suunerinik eqqarsaatiginnilluaqqullugit, minnerunngitsumik facebookimi annertunerusumik akisussaaffeqanngitsumik oqallinnermi, Tuusi kajumissaarivoq.

Taamatut oqaaseqarpoq parteeqataa Naaja Nathanielsen uani sapaatit akunnerani siusinnerusukkut oqaatsili pillugit oqallinnermi avissaartuunnermik siunnerfilik ingerlatsiunnaarnissamik kajumissaarimmat.

Læs "Naaja: Stop grøftegraver-diskussion"

- Oqaatsit kisiimiitsillugit inuiaqatigiittut pingaarnertut toqqammavissarinngilavut. Allarpassuarnik naleqartitaqarpugut, oqaatsillu naleqartitatta ilaminiinnannguaraat. Taamaattumik oqaativut pingaarnerpaatut allanut nakkarsaaniutitut annertuumik atorneqarnerat aammalu oqallinnermi sammisassat pingaarutillit allamut saatseriarneqartarnerannut atugaanerat tupinnartuuvoq.

- Suliassavut annertuut eqqarsaatigalugit immitsinnut qanoq pissusilersorfiginerput isiginiarnerusariaqarparput, Josef Motzfeldt oqarpoq.

Uani sapaatit akunnerani AG-mi Tuusimik allaaserisaq takisooq atuarsinnaavat, ukiorpassuarni politikimik suliaqareerluni tunuarnissani toqqarlugu. Allaaserisaq "Igalikup utaqqivaanga" ilaatigut AG-mi pisiarisinnaavat:

Powered by Labrador CMS