Angut persuttarneqarnerminik toqquteqartoq
Angut 50-it sinnerlugit ukiulik sapaatip-akunnerata naanerani persuttarneqarnermi kinguneranik sisamanngornermi toquvoq - inuit marluk tigummigallarneqarput
Angut 50-it sinnerlugit ukiulik Aasianni sapaatip-akunnerata naanerani ima sakkortutigisumik persuttarneqarsimavoq Nuummi Dronning Ingridip Napparsimmavissuanut timmisartuunneqartariaqarsimalluni, sisamanngornermili toqulluni.
Taama Kalaallit Nunaanni Politimestereqarfimmi unnerluussisuuneq Lars Kirkegaard nalunaarpoq.
Taanna Sermitsiaq.Ag-mut oqaluttuarpoq, inuit marluk tamatumunnga atatillugu tigummigallarneqartut.
Taakkua tassaapput arnaq 18-it inorlugit ukiulik angullu 20-t sinnilaarlugit ukiulik, arfininngornermi tigusarineqartut.
Pisoq politiinit toqutsinertut paasiniarneqarpoq.