Imeq imerneqarsinnaavoq
Nuummi imeqarfik ingerlalliarpoq, taamaattumik imermik qalatitseqqaarnissat pisariaqanngilaq, inuussutissalerinermut nakkutilliisoqarfik nalunaarpoq
Nuummi imeq imerneqarsinnaavoq.
Taama Sermitsiaq.AG-p apeqqutaanut inuussutissalerinermut nakkutilliisoqarfik oqaaseqarpoq.
Apeqqutilliinermut erngup bakteeriaqalersimaneranik ersissuteqaleraluarneq pissutaavoq.
- Imeq imeqinasiuk bakteeriaqarsimagunarpoq, inuillu taama nappaalatiginerannut tamanna pissutaavoq. Eqqarsaatigiinnarlugu ajortippunga. Føj! Taarsiullugu imermik pisigitsi.
Tallimanngornermi facebookikkut e-mailikkullu nalunaarutit arlallit taama nipeqarput.
Inuussutissalerinermik nakkutilliisoqarfimmit imermik nakkutilliisumit bakteeriaqarneranillu uuttuisartumit nalunaaruteqartoqanngikkaluartoq mianersoqqussutit siaruaatilertorsimapput.
Maili ingerlaartitaq uivernermut pissutaasoq
Maili ingerlaartitaq uivertoqalerneranut pissutaaqataavoq. Taanna ullaaq nassiussuunneqarpoq. Sermitsiaq.AG-p takusinnaasai malillugit maili ingerlaartitaq nal. 9.56 tamanut nassiunneqaqqaarpoq tamatumalu kingornalu mailinut tamalaanut ingerlaalerluni.
Sermitsiaq.AG-p pissarsiarisaani Namminersorlutik Oqartussani sulisoq mailimi siullerpaatut inissisimavoq.
Qulequttamut allaffissiami ima allassimasoqarpoq: Ullumi Nuup illoqarfiani qalatitsisarnissamik peqqussummik takkuttoqassagunarpoq, bakteerianik ataani taaneqartunik nassaartoqarsimammat.
Maili ingerlariaqqiffissaq ilanngunneqarsimavoq, tassanilu bakteeria Clostridum, bakteeriat grampositivit, anaerobet (iltimik sapigallit), endosporenik pilersitsisartut 0,4-1,2×3-8 μm-imik angissusillit ilaata allaaserineqarfia. Bakteeriat 100-t sinneqartut pinngortitami, issumi, imermi eqqakkanilu siammarsimasut nassaassaapput. Tamakkualu ilaat allaat uumasut inuillu inalugaanni nalinginnaasumik nasssaassaapput.
Uumasut nakorsaanerat: Imeq imiinnarsiuk
Maili aaqqissuisoqarfimmut takkummat Sermitsiaq.AG oqartussanit oqaaseqartitsiniaraluarpoq.
Uumasut nakorsaanerat Asbjørn Brandt nal. 13 eqqissisaalluni nalunaarpoq, imeq tamanit imerneqarsinnaasoq.
– Erngup Nuummi imeqarfimmeersup qalateqqaarneqartarnissaanik inassuteqaateqartoqarnaviannginnera uppernarsarsinnaavara, imeqarfiup ajunngilluinnartumik ingerlaneranik paasitinneqarama. Aalajangiineq tamanna Nunatsinnut Nakorsaaneq suleqatigalugu pivoq, Asbjørn Brandt allappoq.
Ullumi misissugassamik nutaamik tigusisoqaqqissaaq.