Fleischer: Suulluunniit politikkimit unitsissinaanngilaanga
Politikimik sulialik Knud Fleischer pingasunngornermi ullaakkut anillakkami biilini aserorteriffigineqarsimasoq siumorpaa. Piffissap sivikitsunnguup iluani aappassaanik biilia aserorteriffigineqarpoq taamaakkaluartoq politikkimik suliaqarnissamut kajumissutsi katassimanngilaa
Ilulissani pingasunngornermi ullaakkut Knud Fleischerip biilini aserorteriffigineqarsimasoq anillaffigigamiuk soorunami misigisaqanngitsuunngilaq, taannami ungaserujussuanngitsumi Kattusseqatigiit Partiianit Atassummut nuuppoq, taakkualu sinnerlugit maannakkut Inatsisartunut qinigassanngortilluni.
- Biilera taamaattoq takullugu nuanniitsorujussuuvoq. Saamerlermi assakaasui qaarsimapput biililu qalipaammik seqqitsarneqarneqarsimalluni, biilip iluani spritsip tikka sakkortoqaaq taamatullu biilip iluani ikitsisit kuerarneqarsimallutik, Knud Fleischer nassuiaavoq.
Taanna Sermitsiaq.AG'mut oqaluttuarpoq aatsaat perngaamik biilini aserorteriffigineqanngitsoq. Biili erninilu avitseqatigiillutik pigaat.
- Ungasinngitsukkut biilip qulliinut ledningit kittorartiterneqarsimapput. Nuanniittuaannarpoq taamak pisoqaraangat, Knud Fleischer oqarpoq.
Nunasisuunera pissutigalugu qinngasaartarpaat
Fleischer aamma oqaluttuarpoq nammineq pilluni Ilulissani maannakkut nunagisamini salluliuutinik angalaartoqartoq. Aamma inoqartoq nakkarsaarusuttunik Iluliarmiuiinginnera pissutigalugu.
- Sisimiunit kingoqqisuugama maani illoqarfimmi inuit ilaasa akuerisinnaanngilaatigut illoqarfimmit allamit aggerfeqarnerput pissutigalugu. Ukiut ingerlanerini uanga pillunga tusatsiakkanik eqqunngitsunik pilersitsisoqalersimavoq inuttut nakkarsagaanermut tunngasut. Tamanna akuerineqarsinnaanngilluinnarpoq, Knud Fleischer naqissusiivoq.
Politikki taamaatinnavianngilaa
Maannakkut Atassut sinnerlugu qinigassanngortittoq isumaqarpoq Kalaallit Nunaanni inunnik nakkarsaasarneq unitsinneqartariaqartoq.
- Siunertaqanngilaq. Sakkortoorujussuusarpoq taamannak pineqarluni imminermuinnaanngitsoq aammali ilaquttanik eqquisarami taamak pisoqaraangat.
Knud Fleischer aatsaat taamak nunarput pillugu sulerusutsigaaq.
- Inuit ilaat isumaqarpata tamanna pillugu unissasunga eqqarsaqqittariaqarput. Allaanngilaq nukissannik suli tunineqaannartunga. Nunarput sullikkusuppara. Aamma ippassaanitsiaq aalajangerpunga taamatut pisoqartillugu annermik nukissorfiginiarnagit.