Nutaarmiuni alianartup kingorna ukioq ataasinngorpoq
Kalaallit Nunaanni Politimestereqarfimmiit taartisinissamik piumasaqaat amigaatigineqarpoq allakkap unnerluussutip naalagaaffiup eqqartuussissuserisuanit akuerineqarsimasup piareernissaanut
Ullumikkut februaarip 8-ani ukiup ataatsip matuma siornagut Upernaviup avannaani nunaqarfimmi Nutaarmiuni pingasunik inuartoqarpoq.
Pisoq amiilaarnartoq nunatsinni nunanilu allani tuppatigineqaqaaq.
Taamanikkut 22-nik ukiullip Kunuunnguaq Korneliussenip niviarsiaraq arfineq pingasunik ukiulik, taassuma arnaa 31-nik ukiulik aanaavalu 75-inik ukiulik toquppai. Kunuunnguaq Korneliussen inunnik pingasunik toqutsisutut sisamanillu toqutseriaraluartutut unnerluutigineqarpoq unnerluutigineqarnerminilu pisuusutut nassuerluni.
Sermitsiaq.AG-mit Kalaallit Nunaanni politimestereqarfimmi unnerluussisut pisortaa Helle Olesen aperaarput allakkap unnerluussutip naalagaaffiup eqqartuussissuserisuanit akuerineqartup naammassinissaanut sumut killinnersoq.
Qaammat ataaseq neriuutigaa
- Toqoriarneqaraluartunit taartisinissamik piumasaqaat taamaallaat amigaatigaara. Sulitilluni ajoqusernermut aqutsisioqarfimmit oqaaseqaat utaqqivarput. Oqaaseqaat pissarsiarigutsigu allagaq unnerluussut eqqartuussivimmut tunniussinnaalissavarput, Helle Olesen oqaluttuarpoq.
- Eqqartuussineq qaqugu aallartissasoraajuk?
- Tamanna akisinnaanngilara eqqartuussivimmit ullulerneqartussaammat, allagaq unnerluussut tiguneqareerpat. Neriuppunga allagaq unnerluussut qaammatip ataatsip ingerlanerani tunniussinnaassallugu.
- Kunuunnguaq Kornerliussenip eqqarsartaatsimigut misissorneqarneri tamarmik naammassippat?
- Aap, naammassipput, Helle Olesen akivoq, angulli maannakkut 23-nik ukiulik sumiinnersoq oqaatigerusunnagu.