Partii Inuit isornartorsiorneqartuarsinnarpoq
Atassummiit Knud Fleischerip partiip nutaap kalaallisuinnaq oqalunnissamik siunnersuutaa aamma isornartorsiorpaa
- Partii Inuit qineqqusaarnermi kalaallisuinnaq oqalunnissamik aalajangernera pakatsissutigaara. Qaqugukkut qanorluunniit oqaaseqaraluarutta immitsinnut ataqqilissaagut? Atassut sinnerlugu Inatsisartunut qinigassanngortittoq Knud Fleischer aperaaq.
Isumaqarpoq kikkut tamarmik tusarnaarsinnaasariaqartut.
- Nunatsinni inuppassuaqarpoq maani peroriartorsimasunik kalaallisulli oqalunngitsunik. Susoqarneranik malinnaasinnaasariaqarput. Inuit allat oqaatsitigut piginnaasatik pillugit akuersaarneqassanngippata nunarput ernumanartuussaaq, kalaalerpassuimmi nunani allani najugaqarput ilinniarniarlutik. Taakkulu siunissami inuiaqatigiinni iluaqutaalersussaapput, Knud Fleischer isumaqarpoq.
Innuttaasut suleqatigiinnerunissaat kissaatigaa isumaqarami iluaqutigiinnassagipput.
- Oqaatsitigut piginnaasat pillugit nikassaasariaqanngilagut. Nunatta siunissaa pillugu suleqatigiinniarta, iluaqutaaginnassaarmi. Nunatsinniittut tamaasa ataqqivakka qanorluunniit oqalukkaluartut, Knud Fleischer oqarpoq.
Læs "Juliane: Dansksprogede skal ikke udelukkes"
Læs "Siumut-kandidat revser Partii Inuit"
Læs "Partii Inuit: Det er vores land!"
Siumut IA-lu aamma isornartorsiuipput
Marlunngormat Partii Inuit siulittaasua Nikku Olsen ilaatigut maani Sermitsiaq.AG-mi oqarpoq 'inuit ataasiakkaat pineqanngitsut, isumaqarlutilli Inatsisartuni kalaallisuinnaq oqaluttuqartariaqartoq uagummi nunagaarput. Danmarkimut assersuukkusuppara, Folketingimi naalakkersuinermik suliallit qallunaatut oqaluttussaapput. Taamaattumik Inatsisartuni kalaallisuinnaq oqaluttuariaqarpugut'.
Taamatut oqariartuuteqartoqartorlu Siumut sinnerlugu Inatsisartunut qinigassanngortittoq Ole Aggo Markussen akerliulluni nalunaarpoq. Aamma ullumi siusinnerusukkut Inuit Ataqatigiit sinnerlugit Inatsisartunut ilaasortaq marsip 12-ani Inatsisartunut qinersinissami qinigassanngorteqqittoq ileqimisaartorpoq.