Marlunnik qinigaaffeqarneq: parteeqatimi isornartorsiuinera akerlileraa

IA sinnerlugu Folketingimut ilaasortap Sara Olsvigip pingasunngornermi ullaakkut Inatsisartunut qinigassanngortinnerminik nalunaarutiginninneraniit akunnialuinnaat qaangiuttullu parteeqataa Nikoline Ziemer pilersaarutaanut isornartorsiuvoq.

Olsvig Inatsisartunut qinigaassagaluaruni marlunnik qinigaaffeqalissaaq, Folketingimut Inatsisartunullu ilaasortaalissagami.

- Partiitsinni kikkulluunniit qanorluunniit isumaqarsinnaapput. Kisianni marlunnik qinigaaffeqarneq IA-mi aqutsisunit akerlerineqanngilaq, aamma Inatsisartunut qinigassanngorteqqullunga aqutsisunit kaammattorneqarpunga. Inatsisartunut qinigassanngortinnissara partiimit akerlerineqarsimagaluarpat sassarsimassanngikkaluarpunga, Sara Olsvig Sermitsiaq.AG-mut oqarpoq.

Oqaluttuarpoq, marsip 12-ani qinersinissamut qinigassanngortinniarnini aatsaat marlunngornermi aalajangiukkini.

Læs "IA’s Olsvig vil i Inatsisartut"

Folketingimit ilisimasat atorsinnaasut
- Ullumi siusinnerusukkut oqarputit, Kalaallit Nunaat oqaluttuarisaanermi killiffimmut angisuunik suliassaqarfigilikkatsinnut killissimasoq aamma suliassat tamakkua kivitseqataaffiginissaat suleqataaffiginissaallu kissaatigisorujussuugit. Sunik tunniussassaqaravit?

- Folketingimi sulinera aqqutigalugu misilittagaqalersimavunga IA-mit nunatsinnillu iluaqutigineqarsinnaasumik. Tamannalu pisinnaassaaq Inatsisartunut ilaaleruma, Sara Olsvig nassuiaavoq, Inatsisartunullu qinigaassagaluaruni Inatsisartuni ulapaartoqartillugu Folketingimi sinniisussani (Johan Lund Olsen, aaqq.) aggersartarniarini ilisimasaarutigalugu.

- Folketingimut tullianik qinersinissamut sassarnissaq pilersaarutigaajuk?

- Tamanna qularaara.

Folketingimut ilaasortaq Kalaallit Nunaanni qinigaq ukiumut 680.000 koruunit missaannik aningaasarsisarpoq, Inatsisartunullu ilaasortaq ukiumut 480.000 koruuninik aningaasarsisarluni.