Qaanaamit nipi tusaaneqartariaqarpoq
David Qujaukitsoq isumaqarpoq Qaanaameersumik Inatsisartuni issiasoqartariaqartoq
- Maannamt Naalakkersuisuusut piniagassagut ikilisartuarpaat Qaanaami innuttaasut qanoq aningaasarsiussanersut pilersaarusiornagu. Allaannginnami pisinnaatitaaffitsinnik ilanngartuunneqartugut, David Qujaukitsoq Sermitsiaq.AG'mut oqarpoq.
David Qujaukitsoq oqarpoq Qaanaami innuttaasut pissutsinik isornartorsiuigaluartut qisuariarfigineqaratilli.
- Ukiuni qaangiuttuni illoqarfinnit susoqarfiusunit inuit taamaallaat qinerneqartarput. Uagut paaserusutavut tusaanianeqanngillat. Taamaattumik isumaqarpugut oqaaseqarsinnaatitaanerput innarlerneqarsimasoq, David Qujaukitsoq oqarpoq taanna aamma isumaqarpoq Qaanaami innuttaasut qulaatiinnarlugit aalajangiisoqartartoq.
- Aalajangiiffigisassat tuaviorpallaamik aalajangiunneqartarput. Innuttaasut qanoq isumaqarsut tusaaneqaqqaartariaqarput inuiaqatigiinni allanngortiterinerit pitinnagit. Pitsaanerussaaq Naalakkersuisut misissueqqaartarunik allanngortiteritinnatik, David Qujaukitsoq oqarpoq.
Ullumi innuttaasunik ataatsimiisitsineq
Qaanaami innuttaasut ullumi pingasunngornermi ataatsimiitinneqassapput kina Inatsisartunut qinigassanngortissanersoq pillugu.
- Isumaqanngilanga Qaanaamit Inatsisartunut qineqqusaartussat amerlassasut, taamaassappammi aammaarluta illoqarfitsinnit qinigaasoqartitsinngitsoorsinnaavugut, David Qujaukitsoq oqarpoq taassumalli maannangaaq oqaatigisinnaanngilaa marsip aqqaneq-aappaani 2013 qinigassanngortissanerluni.