Siumut sinnerlugu qinigassanngortittup Partii Inuit avoqqaarigaa
- kalaallisut oqalussinnaanngitsut mattutissallugit ajorluinnartuussaaq, Siumut sinnerlugu Inatsisartunut qinigassanngortittoq, Ole Aggo Markussen oqarpoq
- Inuit ataasiakkaat pineqanngillat, kisianni isumaqarpugut Inatsisartuni kalaallisuinnaq oqaluttoqartariaqartoq uagut nunagigatsigu. Danmark sanilliukkusuppara, tassani politikerit Folketingimi qallunaatut oqaluttussaapput. Taamaattumik Inatsisartuni kalaallisuinnaq oqaluttariaqarpugut.
Taama Partii Inuit siulittaasuat Nikku Olsen ullumi marlunngornermi siusinnerusukkut Sermitsiaq.AG-mi apersorneqarluni oqarpoq.
Taamalu oqaaseqartoqarnera tunngavigalugu Siumut sinnerlugu Inatsisartunut qinigassanngortittoq Ole Aggo Markussen qisuariaateqarpoq:
- Kalaallit Nunaat kalaallillu oqaasii Islandimi Savalimmiunilu pissutsinut sanilliunneqarsinnaanngilluinnarput. Kalaalerpassuit piffissani sivisuuni oqaatsiminnik qularutiginnittarsimasut Islandimi Savalimmiunilu taamaattoqanngisaannarsimavoq. Nammineq oqaaserisanut oqaluttuarisaanermi qularutiginninneq ullumikkut inuppassuit kalaallisut oqaatsinik tamakkiisumik atuisinnaannginnerannik kinguneqarpoq.
Mattussineq ajorluinnarpoq
- Kisianni kalaallisut oqalussinnaanngitsut mattutissallugit ajorluinnartuussaaq. Taamaaliornikkummi innuttaaqatit innuttaasutut pisinnaatitaaffiit tunngaviunerpaartaasa ilaannik arsaarneqassapput, tassalu tamat oqartussaaqataanerannut tamakkiisumik peqataasinnaanermik. Tamannalu arlaannattaluunniit kissaatigisinnaanagulu iluaqutigisinnaanngilaa. Iluamik oqaatigalugu aamma eqqumiilluinnassaaq, Partii Inuit Inatsisartuni kalaallisuinnaq oqaluttoqartalernissaanik kissaataa pillugu Ole Aggo Markussen oqarpoq.
Læs "Partii Inuit: Det er vores land!"
Læs "Partii Inuit: Alle er velkomne i vores parti"
- Inuiaqatigiittut arlalinnik pingaartumik kalaallisut qallunaatullu oqaaseqarfiunitta akuerinissaanut immaqa piffissanngorpoq. Immitsinnut uparuartuutiinnarnata oqaatsinut inatsit taamalu inuiaqatigiinnut ataatsimoorussamik akuulersitsiniartarnermik suliaq nukittorsarlugu immitsinnut kiffartuutissaagut. Taava siunissami ungasinnerusumi immaqa Savalimmiormiutut Islandimiutullu inissisimalersinnaavugut oqaluttuarisaanerput eqqarsaatigalugu, Siumut sinnerlugu Inatsisartunut qinigassanngortittoq oqarpoq.