Uulia pillugu isumaqatigiissut isertuussaq kamaatigigaat

- Issittumi Siunnersuisoqatigiinnit pappialat isertuussat naapertorlugit uuliamik taama annertutigisumik maqisuussagaluarpat taava qillerinerit aallartippata Issittup siunissaa aarlerinarluinnartunngussaaq. Issittumi Siunnersuisoqatigiit uulia pillugu isumaqatigiissutaat pikkorliornerulluinnarpoq.

Taama Greenpeace uuliaarluertoqarnerani upalungaarsimanissamut pilersaarusiap missingiutaanik isertuussamik, Issittumi Siunnersuisoqatigiit maajimi Kirunami ataatsimiilerpata nunat issittumiittut arfineq-pingasut akuerisassaannik, pissarsisimasoq toqqaannartigisumik oqaaseqaateqarpoq.

Upalungaarsimanissamullu pilersaarusiaq avatangiisinik illersuiniaqatigiiffik naapertorlugu 'atorsinnaanngilluinnarpoq’.

- - Missingiutip suliapalaajunera minutserpassuarnillu atuiffiusimannginnera takusinnaassagaanni Issittumi imaluunniit uuliaarluernermut tunngasunik immikkut ilisimasaliusariaqanngilaq, Greenpeacemi Issittumut akisussaasoq, Jon Burgwald, oqarpoq.

Taanna naapertorlugu pilersaarusiaq titarnerit arlaqanngitsuinnaat atorlugit eqikkarneqarsinnaavoq.

Taamaattumik ajorpoq
- Uuliamik aniasoqalissagaluarpat nunat imminnut ilisimateqatigiittartussaapput. Arlaatigut upalungaarsimasoqartariaqarpoq. Ikiortissarsiorluni imminut aperisoqarsinnaavoq, ikiuunnissarli pisussaaffigineqarani. Aamma siornatigut pisimasut ilinniarfiginiarneqarsinnaapput. Tassa. Allamik naamik. Atortut qanoq amerlatiginissaannut piumasaqaateqartoqanngilaq. Ajutoortoqarpat tamatuma kingorna saliisoqarnissaa qulakkeerneqaqqaartinnagu uuliaqarneranik qillerinissat akuersissutigineqannginnissaannik piumasaqaateqartoqanngilaq. Sunnguamilluunniit tunngaviusumik naamik, Jon Burgwald tusagassiuutitigut nalunaarummi allappoq.

Greenpeace issittumi uuliamik qalluinissamut akerliuvoq. Ilaatigut teknologiimik nunani mianernartuni uuliamik aniasoornissamut qularnaarinnissinnaasumik amigaateqarneq pissutigalugu. Kisianni Greenpeace naapertorlugu isumaqatigiissut isertuussaq suliffissuaqarnermut akuersaarneruvoq issittullu uuliasiorfissuarnit piumatorpaloqisumik qalluiffigineqarnissaanut avatangiisinik qularnaarisuunngilluinnarluni..

Nalunaarusiaq isertuussaq maani takuuk