- Tassa uagut nunarput!
Kalaallit Nunaat Kalaallit Nunaannik Danmarkiunngitsumik ateqarnera pissutissaqarpoq, Partii Inuit siulittaasuat Nikku Olsen oqarpoq
- Inunnut ataasiakkaanut tunngassuteqanngilaq, isumaqarpugulli Inatsisartuni kalaallit oqaasii kisiartaallutik atorneqartariaqartut pissutigalugu uagut nunatsinniikkatta. Danmarkimut assersuusserusuppunga, Folketingimi politikerit qallunaatut oqaluttussaammata. Taamaattumik Inatsisartuni taamaallaat kalaallisut oqaluttariaqarpugut.
Taamak oqarpoq Partii Inuit siulittaasua Nikku Olsen, Sermitsiaq.AG'mit apersorneqarluni.
Taanna oqarpoq Island Savalimmiullu namminneq inatsisartuminni namminneq oqaatsiminnik atuinertik ajornartorsiutissaqartinngikkaat aamma uagut taamaaliornissarput utaqqittariaqanngilarput.
- Uagut allanngortikkusutarput tassaavoq isumaqaratta qallunaanit aqunneqarpallaarluta. Nunatsinni suliffeqarfiit qiviaannariarsigit. Tamakku qallunaanit aqunneqarput. Uagut partiitut upperaarput kalaallit namminneq nunaminnik aqutsisinnaasut, nuna Kalaallit Nunaannik ateqarmat - Danmarkiunngimmat, Nikku Olsen oqarpoq.
Utaqqikataappugut
Nikku Olsen oqarpoq Kalaallit Nunaat namminersuleriartortoq. Taanna isumaqarpoq innuttaasut angorusutaat angujumallugit piffissanngortoq piviusunngortitsinissamut.
- Kalaallit Nunaanni qiteriffiuniarpugut. Siunissamut piareersassaagut. Pingaaruteqarpoq aallaqqaataaniilli kalaallisut oqalunnissapput namminiilivikkuttami suut tamarmik kalaallisut ingerlanneqalissapput. Utaqqeqqikkumajunnaarpugut.
- Oqaatsit nunanut sorlernulluunniit pingaaruteqartuaannarput. Nunat sanilerisavut qiviaannariartigik taakkua namminneq oqaatsitik atorlugit aqutsipput, Nikku Olsen erseqqissaavoq.
Partii Inuit, januaarip 24-anni pilersinneqartoq assorsuaq isornartorsiorneqareerpoq pissutigalugu partiimi kalaallit oqaasii taamaallaat atorneqarumammata.
Isornartorsiornerli taanna siulittaasup soqutiginngilaa.
- Danmarkimit sunnerneqarsimaqaagut. 1960'ikkunni 1970'ikkunni kalaallit innuttaasut qallunaatut ilinniarnissaminik qinnuteqarsimapput ilinniagaqarusukkatta. Aatsaat amerlasuut ilinniagaqarsimalerpata namminersorsinnaalissaagut, Nikku Olsen oqarpoq.