Qimussertartut: Kommunip soqutiginngilaatigut

Sisimiuni Qimussip siulittaasua, Gustav Olsen, oqarpoq Qeqqata Kommunia suleqatigiikkuminaatsoq. Taassuma naatsorsuutigaa qimussimik ajutoornerit allat pisinnaasut

Qimusseq Sisimiut, Siulittaasoq Gustav Olsen, oqarpoq Qeqqata Kommunia suleqatigiuminaatsoq. Taassuma naatsorsuutigaa qimussimik ajutoornerit allat pisinnaasut. Assi: Facebook

Sisimiuni januaarip 27-anni qimussersup biilillu ajutoornerat saqqummiunneqareersoq Sisimiuni qimussertartut peqatigiiffiata Qimusseq siulittaasua Gustav Olsen saqqummerpoq nunatsinni illoqarfiit annersaata tulliani qimussertartunut atugassarititaasunik isornartorsiuilluni.

Gustav Olsen naapertorlugu tamanna pissuteqarpoq Qeqqata Kommunianit ajornartorsiutip anigornissaa anguniarlugu suleqatiginnittoqarumanngimmat.

- Kommuni oqaloqatigisaluarparput, allakkanik nassiussisarluta uagutsinnullu atugassarititaasut aaqqinniarlugit taamaasilluta illoqarfitsinni qimuttut inissaqartinneqarsinnaaqqullugit kisianni allaannginnami tusaajumaneqanngitsugut, Gustav Olsen Sermitsiaq.AG.-mut oqarpoq.

Taanna oqarpoq piffissanngortoq qimussertartut peqatigiiffiata kaammattuutai kommunimit tusaaniarneqarnissaat.

Qamutinut inaaliisarfiup eqqaani qulliliisoqarnissaa qinnutiginikuugaluarparput taarsigaangat ulorianarpallaalersarmat. Aamma aqqutissamik pitsaanermik qinnuteqarnikuuvugut taannalu pinikuuarput kisianni aqqusineq ajortorujussuuvoq. Kommunimit oqarfigineqarpugut iluarsaannissaanut akissaqartoqanngitsoq, Gustav Olsen oqarpoq.

Ajutoornerit amerlanerit naatsorsuutigai
- Uanga siorna ajutoornermi akuuvunga snescooterimit aportikkama aamma ajutoornerit arlallit ilisimasaqarfigaakka nalunaarutigineqarneq ajortut. Qamutit inaasa eqqaani aqqusineq silissusissamisut silitsiginngilaq ulorianarsisarluni biilit, snescooterit aamma qimussit ataatsikkut ingerlaaleraangata.

Sisimiuni Qimussip siulittaasua oqarpoq, snescooterit illoqarfimmi sukkavallaamik ingerlaartartut qimuttunullu ajornartorsiortitsillutik.

Taassuma neriuutigaa kommunimut qinersinermi qimussernermik ilisimasalimmik qinersisoqassasoq.

- Kommunimut qinersinissaq qilanaaraaraa. Piffissanngorpoq kommunimit tusaaneqarnissarput neriuppunga pissutsinik ilisimasalimmik qinigaasoqassasoq, Gustav Olsen oqarpoq.

Powered by Labrador CMS