GA: Nunatsinni suliffeqarfik qanoq ilisukkut nunaqavissuusarpa?

Kalaallit Nunaanni Sulisitsisut Peqatigiiffiani pisortaq Brian Buus Pedersen isumaqarpoq taamatut apeqquteqarnissaaq naapertuuttuusoq

Namminersorlutik oqartussat imaluunniit nunap sullissiviutai, suliniaqatigiiffii oqartussaasuilu tikisitanik sulisoqarnertik pissutigalugu kalaaliunngillat? GA-p pisortaa Brian Buus Pedersen aperaaq. Foto: Leff Josefsen

- Suliniutinut angisuunut atatillugu suliffeqarfiit avataaneersut takkuttussanngortut nunatsinni inuussutissarsiortuvut annertuunik tamaviaarutissaqarlualersullu avissaartuunnissaq pisariaqartinngilarput. Taamaallaalli ataqatigiikkutta nunatsinni suliffeqarfiit ineriartornermut sunniuteqarsinnaassaagut. Tassani ilaatigut IBA-mi isumaqatigiinniarnissat soraarummeerutaassapput pingaarutillit

Taama oqarpoq Kalaallit Nunaanni Sulisitsisut Peqatigiiffiani pisortaq Brian Buus Pedersen.

Isumaqarpoq naaertuuttoq aperissalluni qaqugukkut nunatsinni suliffeqarfik 'nunaqavissutut' taaneqarsinnaanersoq.

- Sermitsiaq.AG naapertorlugu sulisitsisutut suleqativut Nusuka ima isumaqarsorinarpoq, kalaallit sanaartortsitsivissui Kalaallit Nunaanninngaanneersuunngitsut. Tamanna saqqummerpoq inissialiortiternissamut suliariumannittussarsioriaatsimut atatillugu, GA-mi pisortaq erseqqissaavoq.

Kingullertigut oqallinnermut Atassut akuleruppoq. Tusagassiorfinnut nalunaarummi partiip siulittaasua Gerhardt Petersen Inatsisartunullu ilaasortat Siverth K. Heilmann Knud Kristiansenilu ilaatigut ima allapput: Atassummiit piumasaraarput aalajangiineq allanngorteqqullugu, nunami maani ingerlatsivinnut inuiaqatigiinnullu kalaallinut sapinngisamik iluaqutaasussanngorlugu. Ingerlatsiviit Kalaallit Nunaanni najugaqavissut periarfissinneqassapput.

Læs "Nusuka: Hjemmehørende har ikke en chance"

Læs "Atassut-støtte til kritik af udskældt byggeprojekt"

Sumut killeqarpa?
Namminersorlutik oqartussat avataanit suliartortunik atuisutut kalaaliunnginnamik? Brian Buus Pedersen aperaaq.

- Kalaallit ingerlatsivii arlallit kalaaliunnginneragaanertik qisuariaatigisimavaat. Taakkunannga marlussuit Nusukamit Atassummillu toqqartorneqartut ukiuni 32-ni arlaallu ukiuni 20-ni Kalaallit Nunaanni suliffeqarfiuteqarsimapput. Taakku sulisuisa amerlanersaat kalaaliupput, ilinniartorpassuit ilinniakkaminnik naammassitittarpaat, inuiaqatigiinnullu akisussaaqataallutik sulillutik.

- Taamaattumik ima aperissalluni peqqutissarpassuaqarpoq: Nusukap Atassutillu suliffeqarfik kalaallit suliffeqarfiattut isigilissappassuk ukiuni qassini Kalaallit Nunaanni suliffeqarfiuteqarsimasariaqarpa? Ukiut 20-t? Ukiut 30-t? Imaluunniit ukiut 40-usariaqarpat? Nusukap Atassutillu suliffeqarfik kalaallit suliffeqarfiutaattut taarusussappassuk suliffeqarfimmit sulisorineqartut kalaallit qassiusariaqarpat? Sulisut 80 procentii, 90 procentii - imaluunniit tamakkiisumik? Namminersorlutik oqartussat imaluunniit nunap sullissiviutai, suliniaqatigiiffii oqartussaasuilu tikisitanik sulisoqarnertik pissutigalugu kalaaliunngillat? Brian Buus Pedersen aperaaq.

Piviusunik tunngaveqanngitsoq
- Nusuka ”sulisitsisut nunaqavissut kattuffiattut” imminut taagorpoq”. Nusuka taamaliussalluni pisinnaatitaavoq, tassani ilaasortaasut allanit nunaqavissuunerusutut imminnut isigilinngikkunik. Kikkut allanit nunaqavissuunerunissaannik unammineq Kalaallit Nunaanni pissutsinut ullumikkut atuuttunut naleqqutinngilaq. Suleqatinut inussiarnersumik eqqaasitsissutigissavara Sulisitsisut ukiuni 47-ni piusimammata, suliffeqarfiillu ilaasortavut 600-t pallillugit amerlassusillit katillutik 7-8.000-inik sulisullit Kalaallit Nunaanni akissariaasartut 80 procentiinik akissarsisartut, GA-mi pisortaq oqarpoq.

Powered by Labrador CMS