Sisimiuni qimussimik ajutoortoq
Qimussertoq Nuummut timmisartuunneqarpoq napparsimmavimmut unitsinneqarluni. Biilimik aporneqarnermigut ilaatigut qinngani napivaa
Sisimiuni qimussertup biilertoq apormagu ajortumik pisoqarpoq.
Aqqunartiternermi saniatigut qinngani napivaa kiinnamigut kilerluni mersorneqartariaqarluni, maannakkullu qimussertoq Nuummut timmisartuunneqarpoq tassani Sanami unitsinneqarluni qinngamigullu suliaritinnissani utaqqillugu.
Ajutoorneq pivoq januaarip 27-ni aqqutip qimusserfiup aqqusernullu ujaraaraasup killinganni.
Sisimiuni qimussertartut peqatigiiffiani Qimussimeersoq Stefan Hammer naapertorlugu qimussimik ajutoorneq 'annertuutut' taaneqarpoq, tassani peqqutaalluni pissutsit pitsaanngitsut Sisimiuni qimmiutillit ukiorpassuanngulersuni atugaat.
Ajutooqqittoqarnissaa ernummatigaa
- Qimusseq Sisimiut Qeqqata Kommunianut arlaleriarluni uparuaasarsimavoq heliportip eqqaani qimmeqarfik nutaaq pitsaanerusumik pilersaarusiorneqartariaqartoq, tamatigulli itigartinneqartarput sumiiffimmut tassunga aningaasaliisoqarsimannginnera peqqutigalugu.
- Ernummatigaarput kingullermik ajutoortoqanngitsoq, kommunalbestyrelselu borgmesteri siuttoralugu kajumissaarpavut ajornartorsiut iliuuseqarfiginiaqqullugu, 500-600-nimmi qimmeqarfik aaqqissuunneqarsinnaanngilaq tamakkiisumik pilersaarusioqqaarnani.