´Kinamiunut inatsit´: Isumasioqatigiinnerup kingorna qallunaat politikerit naammagittaalliorput
Kalaallit Nunaanni aatsitassarsiorneq pillugu isumasioqatigiinnerup kingorna Enhedslistenip illua'tungiliuttullu naalakkersuisut akissutaat naammaginngilaat
Kalaallit Nunaanni nunat allamiut aatsitassarsiornerat pillugu tallimanngormat isumasioqatigiinnermi Christiansborgimi politikerit ataasiinnaq isumaqatigiissutigisinnaasimavaat - tassalu apeqquterpassuit kingorna nutaamik isumasioqatigiinnissaq pisariaqartinneqartoq.
Folketingimi partiit talerperliit kiisami Enhedslisten isumaqatigaat oqarmat aatsitassarsiornermi Danmarkip akulerunnissaanik apeqquterpassuit naalakkersuisut naammaginartumik akissuteqarfiginngikkaat.
- Isumasioqatigiinneq pissarsiffigivallaanngilara. Inatsisinik atortitsinermut ministerip innersuussutigaa kingorna inatsisiliortoqassasoq. Takusinnaasakka malillugit tamanna nutaartaqanngilaq, suliassaqartitsinermut ataatsimiititaliami ilaasortaq Claus Hjort Frederiksen, Venstre, oqarpoq.
Taamaattumik nutaamik isumasioqatigiittoqassamaarpoq apeqquterpassuit akineqarniassammata, tamannalu peqatigalugu saqqummiunneqarpoq inatsisissatut siunnersuut kalaallit marsip 12-ianni qinersinissaasa kingornanut kinguartinneqartoq.
Apeqqutit pingaarnerpaat amigaataapput
Aamma Enhedslistenip sulisartoqarnermut oqaaseqartartuata Christian Juhlip isumasioqatigiinnerup kingorna amigaatit arlallit tikkuarpai, inatsisinillu atortitsinermut ministerip Morten Bødskovip, Socialdemokraterne, aamma suliassaqartitsinermut ministerip Mette Frederiksenip, Socialdemokraterne, akissutaat naammaginngilai.
- Isumasioqatigiinnermi pissarsiakka naammaginngilakka. Sulisartut pisinnaatitaaffii, isumaqatigiissutit suliumajunnaarsinnaanermillu apeqqutit akissutissaat suli amigaatigaavut.
Apeqqutit taakkutuaat amigaataapput, pingaaruteqarpulli, taanna oqarpoq.
Isumasioqatigiinnermi inatsisinik atortitsinermut ministeri saassutarineqarpoq illua'tungiliuttut paaserusummassuk assersuutigalugu politiini, eqqartuussivinni allanilu immikkut suliassaqassappat Danmarki qanoq akiliuteqassanersoq.
Tamannali soqutaanngilaq, Christian Juhl isumaqarpoq, illua'tungiliuttullu saassullugit apeqqutinik soqutaanngitsunik apeqquteqarnerarlugit.
- Partiit talerperpiit apeqqutit soqutaanngivissut ilanngussuuppaat. Qularnanngivippoq suliniussuarmi sulisartunik nunat allamiunik tusintinik arlalinnik sulisoqartussami politiinut assigisaanullu immikkut suliassaqassasoq.
Inatsisinik atortitsinermut ministerip uppernarsarpaa politiinut, pinerluuteqarsimasunik isumaginniffimmut eqqartuussivinnullu Danmarkip aningaasartuutissai nalilerneqarumaartut inatsisissatut siunnersuut saqqummiunneqarpat.
Isumasioqatigiinneq pillugu annertunerusumik atuarit AG-p sapaatip akunnerani tullermi saqqummersussami