Qinersineq pissutigalugu ´kinamiunut inatsit´ kinguaattuussaaq

Suliniussuarnut inatsisip ilaa, Folketingimi akuersissutigineqartussaaq, aatsaat saqqummiunneqassaaq Nunarput nutaanik naalakkersuisoqartaareerpat

Folketingimi illua'tungiliuttut arlallit ammasumik isumasioqatigiinnermi ullup ingerlanerani sanaartorfissat taavaat ´sulisartut najugaqarfiisut matoqqasutut´, pissutigalugu sulisartut nunat allamiut Nunatsinnut tikereernerminni killeqanngitsumik angalaarsinnaanngimmata. Ass.: Arktis Meida

Inatsisartunut qinersinissaq nalunaarutigineqaqqammersoq naalakkersuisooqatigiinnissamillu isumaqatigiinniarnerit naammassereerpata aatsaat paasinarsissaaq sulisartunik kinamiunik akikitsunik qanoq isilluni Kalaallit Nunaannut tikisitsisoqarnissaa Folketingip isummerfigissaneraa.

Tamanna paasinarsivoq ullumi tallimanngornermi Folketingimi ammasumik isumasioqatigiinnermi, tamatumani ilaatigut inatsisinik atortitsinermut ministeri Morten Bødskov, Socialdemokraterne, qaaqquneqarsimalluni akissuteqarfigeqqullugu sulisartunut nunat allamiunut, piffissap ingerlanerani London Miningip Alcoallu suliniutaannik sanaartortussanut, pissutsit suut atuutinneqassanersut.

- Tassami imaakkami, piffissap saqqummiussivissap qaqugu pinissaa nalornartoqarallarmat. Kalaallit Nunaanni qinersinissaq nalunaarutigineqarpoq, taamaattumillu inatsisissatut siunnersuut saqqummiussinnaassanngilarput Kalaallit Nunaanni qinersinerup kingorna Naalakkersuisut tamatuminnga kissaateqarlutik nalunaaruteqareertinnagit, inatsisinik atortitsinermut ministeri Morten Bødskov isumasioqatigiinnermi oqarpoq.

Inatsit nutaaq upernaamut utaqqisinneqassaaq
Taamaallaat nunat allamiunut inatsimmi Kalaallit Nunaannut immikkut ittumik atuuttussaatitsilernikkut, assersuutigalugu sulisartunik kinamiunik tusintilikkaanik nunamut eqqussuisinnaanissaq piviusunngorsinnaavoq.

Tassami suliniussuarnut inatsimmi sulisartunut nunat allamiunut aalajangersagaq qallunaat najugaqarsinnaanermut sulisinnaanermullu akuersissuteqarnissamut piumasaqaataannit allaaneruvoq.

Naalakkersuisut siulittaasuat Kuupik Kleist, Inuit Ataqatigiit, siusinnerusukkut oqarsimavoq qallunaat inatsimmik allannguinissaat kingusinnerpaamik februaarimi pissasoq neriuutigalugu.

Maannali tassa siusinnerpaamik marsip affaani kingullermi inatsisissatut siunnersuut saqqummiunneqarsinnaavoq, tamatumalu kingorna piffissangaatsiaq ingerlareerpat tusarniaaneq ingerlanneqarsinnaassaaq Folketingimilu suliarineqarlunilu taasissutigineqarluni

Sulisartut najugaqarfiat matoqqasoq sakkulinnik nakkutilliisuli
Folketingimilu isumaqatigiinniarnerit sakkortoorujussuanngorsinnaapput, pingaartumik illua'tungiliuttut suilniussuaq isornartoqarteqimmassuk.

Illua'tungiliuttut arlallit ullup ingerlanerani ammasumik isumasioqatigiinnermi sanaartorfissat taakkartorpaat ´sulisartut najugaqarfiattut matoqqasutut´, tassa sulisartut nunat allamiut sumulluunniit angalasinnaassanngimmata Kalaallit Nunaannut tikereerunik.

Tamanna peqatigalugu inatsisinik atortitsinermut ministerip Morten Bødskovip erseqqissarpaa politiiunngitsut, entreprenørilli namminneq, sulisartut nunat allamiut najugaqarfiit avataanni angalannginnissaat isumagissagaat.

Annertunerujussuarmik atuarsinnaavitut sapaatip akunnerani tullermi AG-mi atuarsinnaavutit

Powered by Labrador CMS