Nusuka: Nunaqavissut periarfissaqanngillat
Nunaqavissut suliffiutillit kattuffiata Nusukap naammaginneqaa naalakkersuisut inissialiornermut atatillugu suliariumannittussarsiuussisarnerat
Naalakkersuisut pilersaarutigaat 2013-imi 2014-imilu Nuup ilaani Qinngutsinni 81-inik inissialiornissaq.
Tassunga atatillugu naalakkersuisut suliassat ataatsimoortumik suliariumannittussarsiuuppaat. Taamaalillutik suliffeqarfiup ataatsip naalakkersuisunit toqqarneqartup suliaq tamaat suliarissavaa. Suliffeqarfiup nammineq aalajangersinnaassavaa suliffeqarfiit soorliit suliami atorunamerlugit.
Nunavissut suliffeqarfiutillit kattuffiata Nusukap tamanna ajornartorsiutitut isigaa.
- Nusukamiit paasiuminaatsipparput ulluni makkunani suliffissaaleqisut aatsaat taama amerlatigisut kiisalu praktikerfissaaleqisut aamma taamak amerlatigisut taamatut sanaartugassat ingerlanniarlugit siunnersimammata, Nusukap siulittaasua Gerth B. Lynge oqarpoq.
Nunaqavissut mattunneqarput
Tikkuarpaa suliassaq taamaattoq ikittuinnarnit suliarineqarsinnaasoq.
- MeInissiat 81-assit hovedentreprise atorlugu suliariumannittuussarsiuunneqassappata taava suliffeqarfiit nunatsinninngaaneersut marluk-pingasut kisimik akimik tunisisinnaassapput aammalu suliffeqarfiit nunatta avataaninngaaneersut immaqa marluk, oqarpoq maluginiaqqullugulu suliffeqarfissuit taakku maaniittut aamma kalaallit suliffeqarfiginngikkaat.
Nusukap siulittaasuata qularinngillaa suliassap ataatsimoortumik suliariumannittussarsiuunneratigut sulisinneqartussat amerlanersaat avataaneersuussasut.
- Tamanna nunatsinnut pitsaanerpaanngilaq. Nusukamiit naalakkersuisut kaammattorusuppagut nunatsinnut pitsaanerpaaq sutigut tamatigut suliariumannittuussinikkut anguniaqqullugu, Gerth B. Lynge oqarpoq.
Fagentreprise mod hovedentreprise
Innersuussutigaa suliassat immikkoortillugit suliariumannittussarsiuuttarnissaat 30-nut, inissiat 30-nut 21-inullu avillugit.
- Tassami taamatut iliornikkut immaqa suliffeqarfiit 16-nit suliamik ingerlatsinissaat anguneqassaaq. Aappaattut hovedentreperisimik ingerlanneqassappata immaqa suliffeqarfiit sisamat kisimik ingerlatsissapput. Suliffissat praktikerfissat amerlanerpaat anguniarnissaat suleqatigiissutigisigu, Gerth B. Lynge nassuiaavoq.
Naalakkersuisut siulittaasuata ukiortaami oqaaseqaatimi ilaat tassalu sanaartornerup siaruarneqarnissaa timitalissaguniuk taava sunneeqataasariaqarpoq suliariumannittuussinissap allangortinissaanut.