Jens B: Angallaseriaaseq ingerlalluarpoq

Inatsisartunut ilaasortamut Kristian Jeremiassenimut Siumumeersumut akissummini angallannermut naalakkersuinikkut oqartussaasoq ineqarnermut, attaveqarnermut angallannermullu naalakkersuisoq Jens B. Frederiksen Demokraatineersoq oqarpoq kiffartuussinissamik isumaqatigiissutit ilaatigut Qeqertarsuup tunuani qulimiguulimmik timmisartuussineq naapeqatigiissutaasumik isumaqatigiissutaasut imaaliallaannarlu allanngortinneqarsinnaanngitsut.

- SAngallannermut akisussaasutut kiffartuunneqarnissamik isumaqatigiissutit sivitsorneqarnerinut tamakkiisumik tapersersuivunga. Aamma innuttaasut suli angallasseriaatsimik ingerlalluartumik peqartut isumaqarpunga. Kisiannili aamma ulluni makkunani kiffartuunneqarnissamik isumaqatigiissutit politikkikkut isornartorsiorneqartillugit, tunngavissat pingaarutillit marluk puigorneqartartut isumaqarpunga. Siulleq tassaavoq angallasseriaaseq naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaata akornanni ataatsimut aaqqiigallarnerummat. Aappaani tunngavissaalluni pitsannguisoqassappat aningaasat amerlanerusut pisariaqartinneqarmata, Jens B. Frederiksenip tikkuarpaa.

Læs "Air Greenland: Derfor har vi haft aflysninger"

Ataatsimoortumik naaperiaaneq
Itisiliivoq:

- Angallasseriaaseq Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaata akornanni ataatsimut aaqqiigallarneruvoq. 2012-imi upernaakkut neqerooruteqartitsineq tunngavigalugu kiffartuunneqarnissamik isumaqatigiissutit arlallit naammassineqarnissaat Naalakkersuisut kissaatigaat. Naalakkersuisut naliliinerat malillugu kiffartuunneqarnissamik isumaqatigiissusiornikkut innuttaasut attaveqaatinik pitsaanerusunik qulakkeriffigineqassapput. Kisiannili Naalakkersuisut kiffartuunneqarnissamut isumaqatigiissutinut taakkununnga isumaqatigiissuteqarnissamut piginnaatinneqarnissaat Aningaasaqarnermut Akileraartarnermullu Ataatsimiititaliamit kissaatigineqanngilaq. Taamaattumik angallasseriaaseq maannakkut atorneqartoq Naalakkersuisut aamma Aningaasaqarnermut Akileraartarnermullu Ataatsimiititaliap akornanni aaqqiigallarnerup inerneraa, oqarpoq.

2006-imi taamanikkut Naalakkersuisuusut aalajangerput, aningaasat kiffartuunneqarnissamik isumaqatigiissutinut akiliutigineqartartut ataatsimut katillugit pingajorarterutaat suliassaqarfinnut allanut, taakkununngalu ilanngullugu ilinniartitaanermut nuunneqassasut.

Tamatuma kingorna suliassaqarfimmut aningaasaliissutaasartut ilaneqarsimanngillat, aammalu aningaasanut inatsisissanik isumaqatiginninniarnernut atatillugu aningaasat ilaneqarnissaannik siunnersuuteqartoqartarsimanngilaq

- Angallannermut anngaasat amerlanerusut atorneqassappata, aningaasanik suliassaqarfinnit allanit tigusisoqartariaqarpoq. Taamaattumik ataatsimut nalilersuinissaq pisariaqarpoq. Aammalu ukiut kingulliit qulit ingerlanerini Kalaallit Nunaanni suliassaqarfiit allat, soorlu ilinniartitaanerup salliutinneqarnissaat sulissutigineqartarsimavoq, Jens B. Frederiksen nassuiaavoq.

Bell 212’t ingerlaannassapput
Aamma erseqqissarpaa Bell 212-t allamik taarserneqarnissaat pilersaarutaanngitsoq.

- Kiffartuunneqarnissamik isumaqatigiissutit atuuttut 2014-ip naanissaanut sivitsorneqarput, aammalu piffissami tassani Qeqertarsuup Tunuani suliassat isumagineqarnerinut qulimiguullit Bell-212-it atorneqarnissaat Air Greenland A/S-imit (matuma kingorna Air Greenland) naatsorsuutigineqarpoq. Kisiannili qulimigullip, novembarip qiteqqunneraniit februaarip naaneranut kaperlannerani atorneqartussap IFR-inik atortoqarnissaa qulakkeerniarneqarpoq. Tassalu qulimiguulik atortut atorlugit timmisartorsinnaanissamut akuerisaassaaq, taamaalillunilu taartumi timmisartuussisinnaassalluni.

- Tamatuma saniatigut Air Greenland aalajangerpoq, qulimiguulimmik minnerusumik AS350-imik timmisartuliiniarluni, taamaalilluni Aasianni nunaqarfinnut timmisartuussisarnermi qulimiguulik Bell-212 Ilulissaniittoq isumalluutiginagu ingerlatsisoqarsinnaassalluni, Jens B. Frederiksen oqarpoq.

Nangilluni oqarpoq Bell 212-t qulimiguulinnik anginerusunik taarsernissaat millioninik untritilikkaanik aneqassasoq, taamaaliornikkullu kiffartuussinissamut isumaqatigiissutinut aningaasaliinerit annertuserujussuarneqassallutik.