Kunngeqarnermik pingaartitsisoq nunatsinneersoq
Aallakaatitassiami 'Royalisternemi' assillisartoq Chris Christophersen immikkoortuni 4-mi 5-milu peqataassaaq malinnaavigissavarput ilaatigut prins Joachim malinnaavigigaa
DR1-imi TV-iikkut aallakaatitassiaq nangeqattaartoq ’Royalisterne’ nutaaq sapaatip-akunnerani matumani marlunngornermi takuteqqaarneqartoq Kalaallit Nunaannilu sumiiffippassuarni isiginnaarneqarsinnaasoq assiliisartumit namminersortumit 26-nik ukiulimmit Chris Christophersenimit peqataaffigineqarpoq.
Chris Christophersen nunatsinnit kingoqqisuuvoq assilisanillu suliniummut Kalaallit Nunaata Kiinaanut tunuliaqutaalluni
Se billeder i "Komtessen åbnede Grønlands Ansigt"
Chris Christophersen nunatsinnit kingoqqisuunini pillugu oqarpoq, aanaqqiini ataqqiinilu tassaasut Jakobine aamma Ole Petersen Maniitsumeersut.
- Anaanannit aanaga tassaavoq Gudrun Petersen, Robert, Richard, H.C. aamma Mariane Petersenikkut qatanngutaat.
- Kalaallisut tunuliaqutaqarnerma Kalaallit Nunaannilu ilaqutaqarnerma kinguneranik assilisanik suliniuterujussuarmut ”Kalaallit Nunaata Kiinaa”-nut isumassarsisinneqarsimavunga, qanimullu ikinngutiga komtesse Feodora af Rosenborg tassunga illersuisuuvoq.
Suliffeqarfik Royal Press Photo 2008-mi pilersippaa, nunanilu avannarlerni kunngikkormiunik Skandinaviami malittarinninneq pilertortumik inuuniutigilerllugu. Assiliisartoq inuusuttoq taanna pisuni arlalinni kunngikkormiunut assiliinermik aamma suliassaqartarsimavoq, ilaatigut ukiumoortumik juullisiornermi assilisat suliarineqartussanngoraata kunngikkormiunit atorneqartarsimalluni. Atuakkanik saqqummersitsinerni arlalinni assiliisutut Chris Christophersenip tusaamasat soorlu Ole Henriksen, Dennis Knudsen ministerillu arlallit sullittarsimavai.
Kunngikkormiut immikkut ilisimasaqarfigalugit sulivoq
Chris Christophersenip aallakaatitassiaq Royalisterne immikkoortut sisamaanni tallimaannilu peqataaffigaa, tassanilu Fælledparkenimi sukkaniunnermi Copenhagen Historic Grand Priximi, prinsesse Mariep prins Henriup mikisup aamma takkuffigisaanni, ilaatigut prins Joachimimik malittarinnittoq malinnaaffigisinnaavarput.
Chris Christophersen illussaarsuarmi Sorgenfri Slotimi komtesser af Rosenborgit pingasut meeqqanik ukiumoortumik juullimi pilluaqqussutinik suliaqartitsineranni assiliisaqattaartoq TV-mit aamma malittarineqarpoq.
Chris Christophersen meeraallunili kunngikkormiut silarsuaannik soqutiginnilluinnalersimavoq, Københavnimullu nuunnissamik takorloortakkani imaannaanngitsoq 2006-imi piviusunngortillugu, tassanilu ukiut marluk qaangiunneranni kunngikkormiunik immikkut sammisaqarluni assiliisartunngornissaminik takorluukkani piviusunngortillugu.