- Tuaviussaagut!

- Inuit Ataqatigiit ukioq manna ataatsimeersuarnerat sorpassuartigut manna tikillugu ataatsimeersuartarnitsinnit allaaneruvoq. Qinigaaffik, naalakkersuisuni siuttuuffipput, naangajalerpoq ukioq mannalu ukiup affaa qaangiutsinnagu Kalaallit Nunaanni inuit qinigaannut tamanut qinersissaagut. Piffissami tulliuttumi suliassarpassuaqarpoq. Tuaviussaagullu!

Oqaasii nalunaajaataalu paatsuugassaanngillat Inuit Ataqatigiit siulittaasuat Kuupik Kleist IA-p Sisimiuni ataatsimeersuarnerani oqalugiarmat.

Atuaruk "Oqaaseqartartoq: Ataatsimeersuarneq allanngorfiusussaq"

- Qinigaaffinnut tulliuttunut nalilersugassarpassuaqarlutalu aalajangigassarpassuaqarpugut. Qineqqusaarnissanut piareersassaagut, tamannalu ataatsimeersuarnermi matumani pingaaruteqarnerpaat ilagaat.

- Nalunngilarput ataatsimeersuarnermi matumani Inuit Ataqatigiit aalajangigaat nunap tamarmi innuttaasullu tamarmik siunissaannut malunnartumik kinguneqarumaartut. Nalunngilarput tamanna akisussaaffigalugulu suliassarigipput. Taamaattumik ataatsimeersuarnermi matumani qineqqusaarnissatsinnilu qulequtaavoq ´Siunissarput - akisussaaffipput´. Oqarluartaat taanna Inuit Ataqatigiinnuinnaq atuutinngilaq - tamatsinnulli kalaallinut inuiaqatigiinnut atuulluni, Kuupik Kleist kulturip illorsuani Taseralimmi oqalugiarnermini tikkuaavoq.

Sermitsiaq.AG-p ataatsimeersuarnermit allaaserisai tamasa atuakkit uani

Sorpassuit attorneqarput
Naatsorsuutigineqarluinnartutut Inatsisartunut qinersinissamut ullormik taasaqanngilaq.

Taarsiullugu IA-p siulittaasuata erseqqissarpaa partiip ataatsimeersuarnermi eqqartugai apriilip aappaanni kommunalbestyrelsinut, nunaqarfimmi aqutsisunut ilagiilu sinniisaannut qinersinissanut siunniussanik tikkuussissasut. Soorunamilu ukiumi pisussami pingaarnerpaami: Inatsisartunut qinersinissami, naluneqanngitsutut kingusinnerpaamik juunip 2-anni pisussami, qinigaaffik maanna atuuttoq naappat.

Kuupik Kleistip oqalugiarnermini 2025-imut pilersaarut aamma tikippaa, taannalu tassaavoq 2025-p tungaanut Naalakkersuisut inuiaqatigiit ineriartornissaannut pilersaarutaat, puisinut, arfernut, Issittumut, suliniussuarnut inatsimmut, aatsitassat pingaaruteqassussaannut, partiip immikkoortortaqarfinnut siunnersuutai, ineqarnermut politikkimut kiisalu angallannerup attaveqarnerullu aaqqissuussaaneranut.

Tamatuma saniatigut IA-p siulittaasuata tikippai aalisarneq, nunalerine, nerisassanik pilersuineq, aningaasaqarneq, suliassaqartitsiniarnermik iliuutsit, peqqissuseq katsorsaanerlu, soorluttaaq oqalugiarnermi naggataatigut aamma kalaallit inuiaat kinaassusaat tarningallu tikikkai.

Kuupik Kleistip oqalugiaataa qallunaatut kalaallisullu tamaat atuaruk ataani filini: