IA-p makkua oqaluuserissavai

Uranimut akuersaannginnermik politikkimut maanna ingerlanneqartumut siunissami Inuit Ataqatigiit qanoq isummissappat? Partiip ineqarnermut politikkia allanngortinneqassava? Qanorlu nunami attaveqarneq suliniussuillu? Minnerunngitsumillu: Qinersinissanut qanoq piareersartoqassava?

Tamakkua apeqqutit pingaarutillit ilagaat oqaluuserineqartussat, partii naalakkersuisooqatigiinni siuttuusoq tallimanngorpat ualikkumiit sapaatip unnukkuata tungaanut Sisimiuni kulturip illorsuani Taseralimmi ataatsimeersuarpat.

- Ataatsimeersuarnermi politikkikkut oqallinnermi sammisat pingaarnerpaat oqaluuserissavagut sammisanullu ataasiakkaanut partiip isumai saqqummiutissallutigit, Naaja Nathanielsen, IA-mi aaqqissuussaanikkut siulittaasup tullia Inatsisartunullu ilaasortaq oqaluttuarpoq.

- Taamaasilluni qularnanngilaq udranimut akuersaannginnermik politikkerput, ienqarnermut politikki, nunami attaveqaatit qinersinissallu qitiusumik oqaluuserineqassasut, Naaja Nathanielsen nassuiaavoq, namminerlu qularnartoqartippaa partiip akuersaannginnermut politikkini sakkukillissagaa.

Akuersaannginnermik politikkimik taaneqartoq eqqorpianngilaq, tassa pineqarmat killissarititaq, Naalakkersuisut aalajangersimasaat, tassa imatut qaarsumut tonsimut (60 ppm) annerpaamik 60 grammimik uraneqassasoq.

Aamma atuaruk "Kuupik IA-p siulittaasuatut qinigaaqqissaaq"

Ataatsimeersuarneq pingaarutilik - qinersinissanut piareersarneq
Inuit Ataqatigiit ataatsimeersuarneranni tamatigut partiip politikkia sutigut tamatigut aalajangersarneqartarpoq - Naalakkersuisuniit Inatsisartunut kommunimi politikkimut aamma nunaqarfiit siulersuisuini politikki ingerlanneqartoq.

Partiip immikkoortortaqarfiinit aallartitat 70-it missaanniipput taamaattumillu IA-p politikkianut sunniuteqangaatsiarlutik.

- Kikkut tamarmik qinersinissat oqaluuseraat. Pingaartumik Inatsisartunut qinersinissaq pissanganartorujussuussagunarpoq. Isumaqarput ataatsimeersuarnermi ulloq qinersivissaq taaneqarumaartoq? Imaluunniit Naalakkersuisut siulittaasuat Kuupik Kleist tamatuminnga isertuussiva?

- Tamatta nalunngilluarparput ukioq manna qinersiviusq. Isumaqarpungali kommunimut qinersinissaq annertunerusumik oqaluuserineqassasoq, kommunimut qinersinissaq ullulerneqareersimammat. Taamaallaat Kuupiup nalunngilaa qaqugu Inatsisartunut qinersisoqassanersoq. Ataatsimeersuarnermi oqaluuserineqarunanngilaq, Naaja Nathanielsen Sermitsiaq.AG-mit Hotel Sisimiuni apersorneqarluni oqarpoq.

Naluneqanngitsutut apriilip 2-anni kommunalbestyrelsinut, nunaqarfinni aqutsisunut ilagiillu sinniisaannut qinersisoqassaaq.

Qullermik ikitsinermit qittannermut
Inuit Ataqatigiit ataatsimeersuarnerat tallimanngorpat nalunaaqutaq 14 Taseralimmi aallartinneqassaaq qullermik ikitsinermik erinarsoqatigiinnermillu. Tamatuma kingorna partiip siulittaasua Kuupik Kleist oqalugissaaq aammalu ilaatigut SIK-mit, KNAPK-mit, ICC-mit aallartitat minnerunngitsumillu SF-ip siulittaasua Annette Vilhelmsen oqalugiassapput.

Ullut aappassaanni, arfininngornermi, politikkimi pingaaruteqarnerpaat partiip iluani oqaluuserineqassapput, tassani oqaasinnaanik, partiimi ilaasortat qinersinerni tamani atorsinnaasaannik, nassaarniartoqassalluni.

Ataatsimeersuarnermi pisut pingaarnersaat pissaaq sapaatiuppat ualikkut avammut nalunaarut saqqummiunneqarpat, naatsorsuutigineqartumik pissanganartorsiorneqanngitsumik siulittaasussarsiortoqareerpat, qularnanngitsumik siulittaasoq issimasoq Kuupik Kleist qinigaaqqissalluni, suli unammillerteqanngimmat.

Sapaatiuppat nalunaaqutaq 19 naggataarluni nerersuaqatigiittoqassaaq, tamatumalu kingorna qittattoqassalluni.

Sermitsiaq.AG-p ataatsimeersuarneq malinnaaffigissavaa.