ICC: Nunarput arfanniarsinnaavoq

Suliniaqatigiiffik ICC 2013-mi nunarsuarmi tamarmi arferit pillugit isumalioqatigiissitaq IWC avaqqullugu nunatta nammineerluni arfattassinneranut suliamut akuliuppoq

ICC'p naalakkersuisut nammineerlutik 2013-mi arfattassinnerat taperserpaa. Assimiippoq ICC’p siulittaasua Aqqaluk Lynge. Assi: . Leiff Josefsen

ICC ukiorpassuarni IWC-mi alaatsinaatsutut ilaasortaavoq.

- Ukiuni kingullerni ICC IWC-p ataatsimiinneranni peqataanissaminut periarfissaqartarsimangilaq aningaasatigut amikkisaarneq peqqutigalugu, IWC-mili pisut malinnaavigeqqissaarneqarput pisariaqaraangallu akuliuttoqartarluni, ICC’p siulittasua Aqqaluk Lynge oqarpoq.

Qanittukkut ICC Nuummi ataatsimiimmat arfernut tunngasoq oqaluuserineqarpoq.

Naatsumik oqaatigalugu pineqartoq tassaavoq namminersorlutik oqartussat 2013-mi IWC avaqqullugu namminneerlutik arfattassinnerisa qassiiliuutaanera. Naalakkersuisut uppernarsaatit aallaavigalugit pisassiipput, ICC-lu isumaqarpoq naalakkersuisut taamaaliornissaminnut tamakkiisumik pisinnaatitaaffeqartut.

Eqqortumik aalajangiineq
- ICC-mi siunnersuisoqatigiit kalaallit neqissaqarniarnermik tunngaveqarlutik innuttaasullu pisariaqartitsinerat qulakkeerniarlugu arfanniarsinnaanerat tamakkiisumik taperserpaat, Aqqaluk Lynge oqarpoq isumaqarlunilu suliami uani IWC eqqunngitsuliortoq.

- IWC-p kalaallit ilisimatuussutsikkut misissuinerit tunngavigalugit piujuartitsinermillu tunngaveqarlutik arfattassinnerannik akuersinnginnera eqqortuliornerunngilaq. Taamaattumik ICC-p siulersuisuisa naalakkersuisut nammineerlutik arfattassinnerat taperserpaat, Aqqaluk Lynge oqarpoq.

Læs: ”Hvalkvote-strid: Fuld opbakning fra KNAPK”

Læs også: ”Grønland fastsætter hvalkvoter”

IWC kukkuvoq
Aamma tikkuarpaa nunat IWC-mi ilaasortaatut uumasunik illersuiniaqatigiiffiit kukkusumik paasissutissiinerat upperinerugaat.

- ICC nunarsuarmi tamarmi nunat inoqqaavisa pisinnaatitaaffii iluaquserniarlugit sulisarpoq, IWC-llu qulakkiissallugu pisussaaffigaa kalaallit neqissaqarnissaasat tunaartaralugu arfatassiisoqarnissaa, IWC-mi piginnaasat, maleruagassat allallu nunat tamat akornanni isumaqatigiissutit aallaavigalugit. Ajuusaarutigaarput paasigatsigu nunat IWC-mi ilaasortaasut amerlanersaata uumasunik illersuiniaqatigiit assigisaasalu eqqunngitsumik paasissutissiinerat upperinerummatigit. Ajornartorsiutaavoq, taamatullu ineriartortoqarnera ernumanarluinnarpoq, taamatullu ineriartorneranera eqqumaffigineqarnerusariaqarpoq, Aqqaluk Lynge erseqqissaavoq.

Powered by Labrador CMS