Greenland Expressip akuersissut utaqqivaa
Greenland Express Kangerlussuup Danmarkillu akornanni timmisartuussisinnaanerluni qanittukkut akissutisissaaq
Air Greenland unammillerneqarnissaminut piareersimava. Tamassuma aap-imik akineqarnissaa Gerth Braskip neriuutigaa, Kalaallit Nunaannut timmisartuussinissamik qinnuteqaanni Namminersorlutik Oqartussani suliarineqarpat.
- Naatsorsuutigaarput ullumi, sisamanngornermi, sapaatilluunniit akunnerani tullermi, Namminersorlutik Oqartussanit akissutisissasugut, Greenland Express-imik pilersitsisoq Gerth Brask standby.dk-mut oqarpoq.
Aviisip AG-p ukiaq allanneratut Gerth Brask suliniumminut aningaasaliisinnaasunik ujarlilersimavoq. Tamannalu iluatsippoq, Gerth Brask standby.dk-mut oqarpoq.
Greenland Expressip - timmisartuussisalernissamik akuerineqaruni - Aalborgimit pingaartumik timmisartuussivigisassavai Keflavik kiisalu Amsterdam, Canada, London aamma Tyskland. Tamatuma saniatigut Kangerlussuarmut timmisartuussisarusuppoq, tassanngaanniillu Air Greenlandimik islandimiulluunniit selskabiannik ingerlaqqittoqartassalluni.