Isuma: Qanorooq qatsunnaqaaq
- KNR-ip namminersorlutik oqartussanit ukiumut 60 million koruunit sinnassaatitut atortarnerlugit? KNR nutaamik eqqarsarsinnaanngilaq ingerlariaqqissinnaanngitsutullu illuni. Taama isornartorsiuivoq Kristian Jeremiassen Siumumeersoq
- Qanoruup ullup ingerlanerani aallakaateqattaarnissaa pisariaqarpa? Qatsunnaqaaq.
Taama tusagassiuutitigut nalunaarummi isornartorsiuivoq Siumut sinnerlugu Inatsisartunut Qaasuitsullu Kommuniani kommunalbestyrelsimut ilaasortaq Kristian Jeremiassen, aperalunilu aallakaatitseqattaarneq ilumut pisariaqarnersoq.
- Qaanoruup aallakaateqattaarnissaa soorluuna pisariaqanngitsoq. Taamatut aallakaatitseriaaseq inunnut ikittuinnarnut sammitinneqarpoq, inuppassuarnut aallakaatitsinerminngaaniit, Kristian Jeremiassen oqarpoq, KNR-ilu Nuuk TV-mut Arctic TV-mullu assersuullugu KNR-illu qaffasinnerusumik anguniagaqarnissaa ujartorlugu.
Læs også: KNR erkender skandale
Læs også: KNR-medarbejdere: Ingen tiltro til topledelsen
Læs også: Revser KNR- og kræver løsning
- Nuuk TV aamma Arctic TV isiginnaartumik soqutigisaat aallaavigalugit aallakaatitsisarput niuernerpalaartumillu ingerlanneqarlutik. Oqaatigisinnaanngilara sooq KNR ukiumut 60 million koruuninik aningaasaliiffigineqartaraluarluni pitsaasunik aallakaatitassiornissamik anguniagaqannginnersoq. Ajoraluartumilli isumaqarpunga KNR Nuuk TV-mit Arctic TV-millu ajornerusoq.
Isumaqarpoq DR1-p aallakaatinneqartalernera kinguariarnerusoq. Ilaatigut Qeqertarsuup tunuani isiginnaartunut:
- Qeqertarsuup tunuaniittugut akiliilluta DR1 toqqaannartumik isiginnaarsinnaavarput, maannakkulli taanna akunnernik sisamanik kingusinnerulluni aallakaatinneqartalerpoq, taamaalillutik nutaarsiassat tekst-tv-miittut akunnernik sisamanik kingusinaarlutik aallakaatinneqartalerlutik, Kristian Jeremiassen oqarpoq, isumaqarlunilu KNR-p immaqa aallakaatitassiapassuit toqqorsivimmiittut pitsaasut ilaat aallakaatittalertariaqarai.