Kujataani Angallannermut ataats.: Killissaq tikinneqarpoq

Kujataani angallannermut paatsiveerulluinnartumut akisussaasuuvoq Ineqarnermut, Attaveqarnermut Angallannermullu naalakkersuisoq Jens B. Frederiksen.

Taamak erseqqitsigisumik Kommune Kujallermi Angallannermut ataatsimiititaq tusagassiutinut allakkamini aallarniuteqarpoq.

- Killissaq tikinneqarpoq, taamaattumik Angallannermut naalakkersuisoq Jens B. Frederiksen saqqummertariaqalerpoq, angallannerlu paatsiveerulluinnartoq akisussaaffigilerlugu, soorlu Kujataani tamanna takugipput, Kujataani angallannermut ataatsimiititaliaq isumaqatigiilluni oqaaseqaateqarpoq.

Angallannermut ataatsimiititaliami ilaasortaasut tassaapput siulittaasoq Kalistat Lund, siulittaasup tullia Thomas Ezekiassen aamma ilaasortaq Niels Tækker.

- Unitsitsiinnaqattaarnerpassuit ulluinnarsiutaaginnalersimapput, kiffartuussinissamik isumaqatigiissut nutaap 1. januarimit atuutinneqalerneraniit, taamaalinerani S 61 atorunnaarpoq, helikopterinillu mikisunik marlunnik Bell 212-nik taarserneqarlutik. Unitsitsiinnarnerpassuit nassatarivaat naammaginanngilluinnartumik utaqqinerpassuit. Ima inissakilliornartigaaq, aallarnissaq ataasiinnaq unitsiinnarneqarpat, aqaguani aamma inissaaruttoqartarluni. Ilinniartut ilinniarfimminnut apuusinnaanngillat, Nanortalik sapaatip akunnerisa ilaanni ataasiinnarmik helikoptereqarpoq, innuttaasut misissortikkiartorlutik suliaritikkiartorlutillu peqqissaavinnukarsinnaanngillat, timmisartukkut assartukkat ullorpassuarni kinguaattoortarput inuussutissarsiortunut akornutaasumik, tunisassortut tunisassiornerminni kinguaattoortarput, sulisut suliffimminnut apuusinnaanngillat, aamma nunaqarfittavut mattunneqarluinnarput, Angallannermut ataatsimiititaliaq oqaluttuarpoq.

Akisussaasoq naammanngitsumik paasissutissinneqarsimasoq
- Kingunerisaat paatsiveqanngilluinnarput aamma akisussaasuulluni Naalakkersuisoq naammanngitsumik tunngaveqarluni paasissutissiilluni oqaaseqarsimassaaq, siusinnerusukkut oqaatigigamiuk, Kujataa angallanikkut kiffartuuneqassasoq siornatigutut pitsaassuseqartumik, Angallannermut ataatsimiititaliaq isumaqatigiittoq oqaluttuarpoq.

Taakkua Naalakkersuisup Jens B. Frederiksenip iliuuseqartariaqarnerannik isumaqarput.

- Angallanermut ataatsimiititaliap siulittaasua Kalistat Lund oqaaseqarpoq: ”Angallannermut ataatsimiititaliamiit siorna aasagaali isumakuluutigaarput ajortumik kingunerisassai, taamanikkut ilimagereerparput kiffartuusinermik isumaqatigiissutip kingunerisassai, ajuusaarnaraluartumillu maanna pissutsit ilimagisatsinniit paatsiveqannginnerujusuupput. Aamma Angallanermut ataatsimiititaliap taamanikkut uparuarpaa assuarnartuutikkatsigu, kommunip tusarniarneqarsimannginnera aamma kiffartuussinissamik isumaqatigiissummut peqataatinneqannginnera kiisalu pisariaqartinneqartoq sivisuumik atuuttumik kiffartuussinissamut isumaqatigiissuteqarnissaq, taamaalillutik ingerlatseqatigiiffiit aningaasaleerusussuseqassammata, taamatuttaarlu pisariaqartoq isumaqatigiissutit akitigut iluarsiivigineqartarnissaat, Angallannermut ataatsimiititap Kalistat Lund oqarpoq nangillunilu:

- Angallanneq inuussutissarsiutillit atugarisaannut pingaaruteqarnerpaat ilagaat. Kujataata nammassinnaanngilluinnarpaa ukiuni tulliuttuni marlunni Kiffartuussinissamik isumaqatigiissut maanna atuuttoq, taamaattumik Kujataa unittuussaaq.

Aaqqissuisoqarfimmit Jens B. Frederiksen oqaaseqartinniarsaraarput.