Nuummi tillinniarfigitittut arlaqartut
Qaammatip ataatsip iluani Nuummi tillinniat ajornartorsiutaapput. Politiit isumaqarput tillinniaqatigiittartut assigiilluarsinnaasut
Siullermik Nuummi Telep qullersaqarfiani tillinniat suli inuttarsineqanngitsut 100.000 koruunit nalinginut annissuisimapput.
Tullissaatut Hotel Hans Egede ullut marlussuit ingerlaneranni marloriarluni tillinniarfigineqarpoq. Tillinniat kinaassusersineqanngitsut fjernsynit arlallit assigiinngitsunik angissusillit annissimavaat.
Sapaatip akunnerata naanerani Industrivejimi suliffeqarfiit ilaannit sikaritsit kartonnit 40-t tillinneqarput. Aamma Nuummi. Maannakkut paasinarsivoq timersuutaarniarfik Pikkori Sport marlunngornermut unnuaani ingasattumik tillinniarfigineqarsimasoq. Tassannga kaatiguut, atisat, isarussat allallu 125.000 koruuninik nalillit tillinneqarsimasut.
Maluginiarneqartut
Tillinniartarnerit imminnut ataqatigiissinnaanerat Nuummi politiinit ilimagineqarpoq.
- Qulakkeerlugu oqaatigisinnaanngilarput tillinniat assigiiunersut kisianni tillinniartarnerit imminnut ataqatigiilluarsinnaapput, politikommissær Niels Nyvang, Nuuk Politi oqarpoq.
- Maluginiarparput tillinniarfigineqartut taamak amerlatiginerat aamma politiinit misissuiffigineqarpoq tillinniat imminnut ataqatigiissinnaanerat, Niels Nyvang oqarpoq erseqqissaatigeqqillugu, politiit innuttaasunit ikiorneqarnissamik pisariaqartitsimmata.