Saviminilerinermik Ilinniarfiup siunissaa nalorninartoq

Naak ilinniartitaanermut, ilisimatusarnermut nunanilu avannarlerni suleqatigiinnermut naalakkersuisoq Palle Christiansen Demokraatineersoq nalunaaruteqaraluartoq suleqatigiissitamik pilersitsisoqassallu taassumalu Nuummi Saviminilerinermik Ilinniarfiup Sisiminut nuunnissaa pillugu periarfissanik ujartuillutik, taamaattoq suli aalajangiisoqarsimanngilaq.

Tamanna Saviminilerinermik Ilinniarfiup Sanaartornermillu Ilinniarfiup siulersuisuini siulittaasup Alex Nørskovip erseqqissarpaa.

- Piviusoq tassaavoq ilinniartitaanermut naalakkersuisup Palle Christiansenip avammut nalunaarutigimmagu suleqatigiissitanik pilersitsisoqarniartoq, taassumalu Saviminilerinermik Ilinniarfiup Sisimiunut nuunnissaanut atatillugu pitsaaqutit ajoqutillu oqimaaqatigiissaassagai, Alex Nørskov oqarpoq nangillunilu tamanna maajimi 2011-mi siulersuisut naalakkersuisoqarfimmut innersuussutigaat ilinniarfiit kattunneqarsinnaanerannut atatillugu naalakkersuisoqarfimmit pitsaaqutit ajoqutillu suunersut apeqquteqartoqarmat.

Læs "Jern- og Metalskolen på vej til Sisimiut"

Siulersuisut taamatut apeqquteqaammut akissutitut suleqatigiissitanik pilersitsinissaq innersuussutigaat, taassumalu aningaasaqarneq, siunissami ilinniartitaanermi suliniutissat assigisaallu pillugit paasissutissanik katersissapput kiisalu assigiinngitsunut soqutigisaqartunullu tusarniaallutik ilinniarfiit assigiinngitsut siunissami sumi inissisimanissaannut innersuussisoqartinnagu.

Suleqatigiissitamik pilersitsisoqarnissaanik aalajangiineq naalakkersuisut apriilimi 2012-mi ilinniartitaanermut periusissanut ilannguppaat.

- Siulersuisut upperaat tatigalugulu naalakkersuisut tamat naalakkersueqataanerat naapertorlugu ingerlatsisut ilinniarfiit, sulisut, sulisitsisut allallu soqutiginnittut ammasumik oqaloqatigalugit Saviminilerinermik Ilinniarfiup illutaannut atortuinullu aningaasaliinissaq pillugu. Aamma ilinniarfiit tamakkiisumik ilaannakuusumilluunniit kattunnissaat pillugu, Alex Nørskov oqarpoq.