Wæver naalakkersuinermik suliaqaqqinnialerpoq

Jørgen Wæver Johansen naalakkersuinermik suliaqaqqinnialerpoq, taamaattoq nuna tamakkerluguunngitsoq

Jørgen Wæver Johansen naalakkersuinermik suliaqaqqinniarpoq, taamaattoq nuna tamakkernagu. Foto: Leiff Josefsen

- Nunaqqatinnit inuussutissarsiornermillu suliaqartunit arlalissuarnit kajumissaaneqarnermigut Jørgen Wæver Johansen partiiminut Siumumut nalunaarpoq Kommune Kujallermi kommunalbestyrelsemut qinigassanngortilluni.

Taama Siumup Qaqortumi immikkoortortaaniit tusagassiuutitigut nalunaarummi allassimavoq.

Jørgen Wæver Johansen 1999-mi naalakkersuinermik suliaqalerpoq Inatsisartunut qinigaagami 2002-mi 2005-milu qinigaaqqilluni.

1999-miit 2007-mut naalakkersuisunut ilaasortaasarpoq kingullermik ineqarnermut, attaveqarnermut aatsitassanullu tunngasunut.

Jørgen Wæver Johansen 1999-mi isumaginninnermut suliffeqarnermullu naalakkersuisuulluni 2001-mi soraartariaqarpoq aningaasaliissutaanngitsunik atuivallaarsimanermigut.

Iliuuseqarusuppoq
Kukkussuteqartaraluarluni Jørgen Wæver Johansen naalakkersuinermik suliaqaqqilernissaminut piareerpoq.

- Inuiaqatigiinni najugarisani iliuuseqaqataanissaq pineqarpoq, Jørgen Wæver Johansen oqarpoq nangillunilu:

- Kujataani periarfissarpassuaqarpugut tamaviaarutissalli aamma annertoqaat. Isumaqarpunga ilorraap tungaanut ingerlalersitseqataasinnaallunga. Najukkanni siunissamut takorluugaqarpunga, qularinngilaralu suleqatigiinnikkut takorluukkat piviusunngortissinnaallugit. Ukiuni aggersuni avataaniit aningaasaliisoqarnissaa sammineqassaaq nunap immikkoortuani pilersaarutit piviusunngortinnissaannut, aammalu maani najugallit sulisuunissaat suliffeqarfiillu suleqataanissaat piareersarlutigu, Jørgen Wæver Johansen oqarpoq.

2007-mi Jørgen Wæver Johansen naalakkersuisunit tunuarpoq inuussutissarsiornermi suliaqarniarluni. 2007-miit 2010-mut Greenland Venturemi pisortaavoq.

Apriilip aappaani kommunalbestyrelsenut qinersisoqassaaq.

Powered by Labrador CMS