Pinngortitaq avatangiiserlu pillugit nersornaatip aappaa tunniunneqartoq

2004 aallarnerfigalugu Namminersorlutik oqartussat inuit, sullissiveqarfiit, suliffeqarfiit soqutigisaqaqatigiiffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit akissarsiaq tunniuttarpaat.

Inuit qassit nersornaaserneqassanersut ukiumiit ukiumut allanngorartarpoq. Ukioq-mannali inuit sisamat nersornaasigaasussat Nunamut namminermut, avatangiisimut pinngortitamullu naalakkersuisoq Anthon Frederiksen, Kattusseqatigiit Partiiat, oqarpoq.

Nersornaaserneqartussat suli marluupput
Sapaatip akunnerata siuliani Ane Marie Olrik, Qeqertarsuaq, nersornaaserneqarpoq tamatumuunalu Karl Lynge, Ilulissaneersoq avatangiisinut nersornaammik pissarsivoq. Taamaasilluni inuit marluk 2012-imi nersornaammik suli pissarsisussaapput.

Katerisimaartitsinikkut Namminersorlutik oqartussat Pinngortitamik Avatangiisinullu mianerinninneq pillugu nersorinnilluni 2012-imi akissarsiassaq Karl Lyngemut tunniuppaa.

Karl Lyngemut nersorinnilluni tunngavilersuinermini Anthon Frederiksen ilaatigut oqarpoq:

- Karl Lynge, soraarneq, ukiuni amerlasuuni Ilulissat illoqarfiata saligaatsuunissaa isumagisaraa. Eqqakkanik katersuiuartuusimavoq, suligaluaruni sulinngikkaluaruniluunniit. Karl Lynge illoqarfimmi suli saliinnermik isumagisaqartarpoq, taamaaliortarneralu illoqarfimmut Ilulissanut annertuumik pingaaruteqarpoq.

Namminersorlutik oqartussat Avatangiisinut pinngortitamullu mianerinninneq pillugu nersornaat 10.000 koruuninik aningaasartaqarpoq.