Qulimiguulik aalisartumik ikiuiartortoq
Ataasinngornermi ualikkut qulimiguulik S-61Ilulissat kangerluannut aallartittariaqarsimavoq aalisartup ajunaalerluni maydayimik Aasiaat Radio aqqutigalugu kalerrisaarinerata kingorna
Sapaatip-akunneri marlussuit matuma siorna SAR'imik annaassiniarneq kingullermik qulimiguulik S-61 atorlugu ingerlanneqartariaqarsimavoq, aalisartut marluk Ilulissat kangerluanni sikumit nikeriarfissaarunneqarmata.
Ataasinngornermi ualikkut kingumut qulimiguulik S-61 atorlugu annaassiniarnermik ingerlatsisoqaqqittariaqarsimavoq, Ilulissani politiit nalunaarfigineqarmata angut 43-nik ukiulik sikunit nikinnaveersinneqarsimammat.
- Aalisartoq sivisuumik kangerlummiissimavoq. Taassuma tupaallaatigisimavaa sikunit nikeriarfissaarunneqarnini, taamaasillunilu kangerlummi puulukerneqarluni. Piffissap ilaa pisoq ima ilungersunarsitigisimavoq angallamminit sikuminertamut qimaasariaqarsimalluni, Ilulissani vicepolitikommissær Karl Vinther Sermitsiaq.AG'mut oqarpoq.
Nikeriarnissaq ajornavissimavoq
Ilulissani politiit aalisartumut ikiortariaqartumut ornigunnissaq periarfissarsiorsimagaluarpaat kisianni sikoqarpallaarnera pissutigalugu ajornarsimalluni.
- Ikiuukkiartornissatsinnut periarfissat misissoreeratsigit aalajangerpugut qulimiguulik S-61 Kangerlussuarmit aggersartariaqassallutigu, Karl Vinther oqaluttuarpoq.
Annaassiniarneq ajornartorsiuteqanngitsumik ingerlanneqarpoq annaassiniaasullu aalisartoq nal. 16.30 nunamut oqquppaat. Angut ajunngilaq annersimaganilu, vicepolitikommissær Karl Vinther oqaluttuarpoqti
Taassumalli ilisimatitsissutigisinnaanngilaa aalisartup angallataa 21 fod-i qanoq pisimanersoq.