Qallunaat partiivi: Naalagaaffik Kalaallit Nunaanni akuliuttariaqarpoq

Politikkikkut amerlanerussuteqartut naalakkersuisut avaqqullugit 'Dong 2-mik' siunnersuut tapersersorpaat, taanna aqqutigalugu qallunaat Kalaallit Nunaanni aningaasaliinissaat qulakkeerneqarsinnaapput - taamaaliornikkullu Kinamiut ingalassimaarneqarsinnaapput

Politikkikkut amerlanerussuteqartut naalakkesuisut avaqqullugit 'Dong 2-mik' isumassarsiaq tapersersorpaat, qallunaat Kalaallit Nunaanni aningaasaliinissaannut periarfissiisoq. Assi: Leiff Josefsen

Naluneqanngitsutut, manna tikillugu qallunaat Kalaallit Nunaanni aatsitassarsiornissamut soqutiginninneq annikitsoralaannguusimavoq.

Tamannali maannakkut Folketingimi partiinit arlalinnit allanngortinniarneqarpoq.

Dansk Folkepartip siulittaasua, Kristian Thulesen Dahl, siunnersuuteqarpoq Danmarkip naalagaaffia ingerlatsivimmik aallartitsisariaqartoq soraanerussutisiassanut katersiviit ingerlatsiviillu angisuut ataatsimoorlutik nunami aatsitassat toqqorsimaannartut katersorniassammatigit.

Politiken taamak allapooq.

Naalakkersuisut avaqqullugit amerlanerussuteqartut
Taassuma oqaluttuaraa Kalaallit Nunaat suleqatigisariaqartoq. Taamaattoqassappat, ilanngullugu assersuutigalugu Kinamit sunnerneqarneq pinngitsoortinneqassaaq, taakkuami isaanissaminnut pilersaarusioreerput Nuup Kangerluani Isukasiani London Miningip savimminissiorfimmik pilersaarutaa aqqutigalugu.

- Peqataaniarutta periarfissatuaraarput Dong nummer 2 aallartisarnissaa. Naalagaaffik ineriartortoqarneranut suliniaqataassaaq, taamaalilluta qallunaat Kalaallit Nunaanni aningaasaliinissaminnut soqutiginnittut sullisissavavut. Tamanna pingaaruteqarluinnarpoq. Sakkortuumik nalilerneqassaagut maannakkut toqqaannartumik pissusilersorsinnaanngikkutta, Kristian Thulesen Dahl oqarpoq.

Venstre, Konservative aamma Enhedslisten tamarmik Dansk Folkepartiip siunnersuutaanik iluarusuuteqarput taamaattoq naalakkersuisuutitaqartut Socialdemokratit Kalaallit Nunaat pillugu oqaaseqartartuat Flemming Møller Mortensen, manna tikillugu naalagaaffiup akuliunnissaanik tapersersuinngilaq.

Socialdemokratit: Qujaannarpugut
- Ministeriuneq aamma Kuupik Kleist erseqqissumik oqaatigereerpaat qallunaat inuussutissarsiortuini oqaloqatigiinneq aallartinneqalersoq aamma manna naalagaaffiup aningaasaatai atorlugit suliarineqartariaqartoq. Allamik oqaasissaqanngilanga Flemming Møller Mortensen Politikenimut oqarpoq.

Naalakkersuisut siulittaasuat Kuupik Kleist, Inuit Ataqatigiit, aamma qallunaat ministeriunerat Helle Thorning-Schmidt, Socialdemokratit, sapaatip-akunnerata siuliani suleqatigiinnissamik isumaqatigiissut saqqummiuppaat, tassani qallunaat Kalaallit Nunaanni aningaasaliinissaat periarfissarsiuunneqarpoq.

Powered by Labrador CMS