DF: Qallunaat aatsitassarsioqataanissaannut periarfissaq kingulleq

Dansk Folkepartip siulittaasuata tunngavilersuutai atuakkit, taanna isumaqarpoq qallunaat naalagaaffiata Kalaallit Nunaanni aatsitassarsiornissamut peqataanissaanik isumassarsiaq pitsassuusoq

Dansk Folkepartimi siulittaasoq, Kristian Thulesen Dahl, siunnersuuteqarpoq Danmark naalagaaffiup pigisaanik ingerlatsivimmik aallartitsisoqassasoq, soraanerusutisiassanut katersiviit ingerlatsiviillu angisuut nunattalu naqqanik pisuussutissarpassuarnik piiaanissamut aningaasaliinissamik qulakkeerinnissapput. Assi: Facebook

Soorlu saqqummiunneqareersoq Dansk Folkepartip siulittaasuata Kristian Thulesen Dahl, siunnersuutigaa qallunaat naalagaaffiat soraarnerussutisiassanut katersiviit ingerlatsiviillu angisuut peqatigalugit ingerlatsivimmik nutaamik aallartitsissasut, Kalaallit Nunaata naqqani pisuussutissarpassuarnik piiaanissamut qulakkeerisussat.

Siunnersuut assigiinngitsunik isumaqarfigineqarsinnaavoq pissutigalugu juulli sioqqullugu suliniutinut angisuunut inatsit Inatsisartuni akuersissutigineqartoq unikaallatsinneqarsinnaammat.

Isornartorsiuisut aamma oqaatigaat DF nunasiaatilittut pissusilersorluni aatsitassanik suliassaqarfik - iserfiginiarsaraa, naak Kalaallit Nunaata nammineq akisussaaffigilereeraa.

Illuatungaanik, DF-siulittaasua oqarpoq.

- Imaanngilaq Danmarki Kalaallit Nunaat akerlilerniaraa. Uani pineqarpoq ataatsimoorluta Kalaallit Nunaannit aatsitassat atorluarnissaat. Ataatsimoorluni aningaasaliisoqarsinnaavoq kisianni aamma iluanaarnissamut periarfissaqarluni. Peqataajumasoqanngippat tassanngaannaq Kinamiut 4.000-t qanorluunniit akilerlunneqarlutik sulisinneqassapput uagut nuannarinngisatsinnik. Tamanna kialluunniit iluanaarutiginavianngilaa, Kristian Thulesen Dahl, Politikenimut oqarpoq.

Kinap Kalaallit Nunaat qarsupissinnaavaa
Thulesen Dahl naapertorlugu qaammatini makkunani piffissaq nalorninartorsiorfik atugarineqarpoq, Danmark kingullerpaajulluni ineriartornermut periarfissaqartinneqarluni.

Politikenimit DFip siulittaasua aperineqarpoq Kalaallit Nunaannut suna iluanaarutaassanersoq qallunaat naalagaaffiata, soraarnerussutisiaqalernissamut katersiviit aamma ingerlatsivissuit 'Dong 2' iluaqqutiginialissappassuk.

Tassunga Kristian Thulesen Dahl akivoq:

- Kalaallit Nunaata nunamik piginnittussaanini pigaa taamaattumillu aningaasatigut iluanaartussaalluni tassannga aningaasasiulissagaluaruni. Uagut immikkut piginnaasaq aningaasaliissutillu neqeroorutissavagut. Kalaallit suleqatiginissaat neqeroorutigissavarput taamaaliornikkut nunarsuaq tamakkerlugu aningaasaliinissamik soqutigisallinnit aqunneqassanngillat. Imaluunniit naalagaaffissuarmit Kinamit ima pissaaneqartigisumit kalaallinik oqaasissaarutsitsisinnaallutik.

Powered by Labrador CMS