Inuuneq inuusuttut isaannit isigalugu
Unnuk kulturisiorfimmi inuusuttut Paamiuneersut, Tasiilameersut Nuummeersullu 45-t Nuuk tiguassavaat. Grønlandsbankip silataa inuusuttut assilisaannik qaammarsarneqassaaq
Asanninneq, maqaasineq, kipisaneq, qularneq, nuannaarneq, aliasunneq, neriunneq quiasaarnerlu. Misigissutsit inuusuttut inuuneranni malunnaateqarluartartut.
Oqaatsillu takkua inuusuttut Paamiuneersut, Tasiilameersut Nuummeersullu 45-t Images of Greenland - Youth for Future 2013 qulequtaralugu assilisani 250-ini saqqummersitaanni pingaarnertut inissisimassapput. Januaarip 26-ani unnuk kulturisiorfimmi Nuummi Grønlandsbankip iigaani assilisanik seqersittakkanik takutitsineq.
Piareersarfimmi sammisaqartitsinerit arlalissuit inernerattut assilisat 250-it seqersittakkatut takutinneqassapput. Saqqummersitsineq Kommuneqarfik Sermersuumi borgmesterimit Asii Chemnitzimit inuusuttut saqqummersitseqataasut pingasut peqatigalugit ammarneqassaaq.
- Assilisanik suliniut Youth for Future Aningaasaateqarfimit Sermermit tapiissuteqarfigisinnaasimagatsigu tulluusimaarutigaarput. Suliniutit Kommuneqarfik Sermersooq pitarlugu unammillertut, isumassarsisitsisut ataqatigiissitsisullu pingaartilluinnarpavut. Aamma inuusuttut eqeersimaarlutik saqqummiussaqarnerat immikkut nuannaarutigaarput.
Assilisanik suliniut aqqutigalugu Youth for Future inuusuttut pilersitsisinnaanerannik eqquilluarsimavoq inuusuttullu sunik neriuuteqarnerannik, takorluugaqarnerannik qularutiginninnerannillu tamatta qaqutigoortumik paasisaqarfigisinnaasatsinnik ajunngivissumik ersersitsilluni.
- Aningaasaateqarfik Sermeq neriuppoq, inuusuttut eqqumiitsuliornikkut tunniussaat kusanartut inuusuttutut isumaqarluartumik inuunerup sunik imaqarneranik oqallinnermik pitsaasumik pilersitseqataassasut, Aningaasaateqarfimmut Sermimut siulittaasoq borgmester Asii Chemnitz Narup oqarpoq.
Aamma katersugaasivimmi
Unnuk taanna Nuummi eqqumiitsulianik katersugaasivik Nuuk Kunstmuseum illoqarfinni taakkunani pingasuni sammisaqartitsinernit assilisanik 50-inik suliniummut Images of Greenland – Youth for Future 2013-imut ilaasunik saqqummersitsissaaq.
Saqqummersitsineq nal. 20.00 meeqqat illersuisuannit Aaja Chemnitz Larsenimit inuusuttut pingasut illoqarfinnut pineqartunut sinniisuusut peqatigalugit ammarneqassaaq.