Aallarnisaasut 10.000 koruunit unammissutigigaat
Sapaatip-akunnerata naanerani matumani ullunut ulapaarfiusunut pingasunut aallarnisaasut isumassarsiaminnik misiliivigisinnaasaannut Niuernermik Ilinniarfik tunuliaqutaavoq
Aaqqissuussineq tallimanngornermi ualikkut Nuummi Niuernermik Ilinniarfimmi aallartimmat aallarnisaasunngorniat qanorluunniit ukiullit 25-t takkussimapput.
Siunnerfigineqartut tassaapput innuttaasut aallarnisaarusuttut imaluunniit suliniummik niuernermiluunniit pilersaarusiamik ineriartortitserusuttut.
Peqataasut suleqatigiiaanut agguarneqassapput sapaatip-akunneratalu naanera qaangiutsinnagu siunnersortinit ikiorneqarlutik pilersaarusiussallutik.
Inuussutissarsiornermi ingerlatallit pingaarutillit arlallit aaqqissuussinermut aningaasaliisuupput. Namminersorlutik Oqartussat aningaasaliisarfiat Greenland Venture pingaarnertut aningaasaliisuuvoq, allallu tassaallutik BankNordik, Air Greenland, Deres Auto, Notabene, NuukFM, Carlsberg, Pissifik, Vinslottet aamma Nønne.
Aningaaserivik akissarsiassat pingaarnersaannik 10.000 koruuninik aningaasartalimmik aningaasaliissuteqarpoq, tamatumalu saniatigut allanik akissarsiassaqassalluni.
Naliliisussat tassaapput pisortaaneq Michael Binzer, Air Greenland, aningaaserivimmut pisortaq Bjartur Nolsøe, BankNordik, pisortaq Jens Lauridsen, Mittarfeqarfiit, kiisalu tuniniaanermut nittarsaassinermullu pisortaq Claus Nissen, NuukFM.
Ajugaasut sapaatip ingerlanerani toqqarneqassapput.