Taamaattumik Ane nersornaasigaavoq

Ane Marie Olrik, Qeqertarsuaq innuttaasut maligassiuilluartut ilagaat pinngortitamut ataqqinnittuuvoq taassuma eqqiluitsuunissaa sapinngisaq tamaat angullugu suliniuteqarfigalugu.

Taamaattumik namminersorlutik oqartussat pinngortitamut avatangiisinullu nersornaasiuttagaanik 2012-imi pissarsisuulluni immikkoortumi ”Pinngortitaq Avatangiiserlu igitaqarfiunngitsoq”.

Inuit, sullissiveqarfiit, suliffeqarfiit soqutigisaqaqatigiiffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit akissarsiaq tunniunneqartarpoq.

Pinngortitamik Avatangiisinillu mianerinninneq pillugu nersorinnilluni 2012-imi akissarsiap Ane Marie Olrikimmut tunniunneqarneqarnissaanik Naalakkersuisut toqqaagamik imaattumik tunngaveqarput:

- “Ane Mariep ukioq kaajallallugu Qeqertarsuup nunataata eqqiluitsuunissaanik pingaartitsisuuvoq, Ane Marie taamaattuunera pissuteqarpoq Ane Mariep pinngortitamik ataqqinninneq mianerinninnerlu ulluinnarsiutigisarimmagu. Suliartoruni, soraaruni, pisuttuaruni, asiarluni aallaqataaguni tamatigorluinnaq eqqakkanut puusaminik nassataqartarpoq.

Nuna Støvsugertarpaalusooq

Puussiamut ikisinnaasuinnaat kisiisa tigoorarneq ajorpai, sanilimi ilaquttamilu qimmilivii salittarpai, allaallu igitassanik oqimaatsunik suliaqartarluni aqqusernup sinaatungaanut tigoriaannanngorlugit iliorartakkaminik. Taamannak ingerlaaseqarneq Ane Mariep ukiorpaalunngortuni ilisarnaatigaa, tassa nammineq piumassutsini atorlugu Qeqertarsuup nunataanik saligaatsuutitseqataalluinnartuulluni.

Nunamut Namminermut, Pinngortitamut Avatangiisinullu Naalakkersuisut Anthon Frederiksen tunniussinermi ilaatigut oqarpoq inuit Ane Marietut ittut amerlanngitsuusut ataasiakkaat eqqakkanik katersisartut eqqaassanngikkaanni.

Nersornaaserneqartoq checkimik 10.000 koruuninik nalilimmik tunineqarpoq.