Allakkanik uissuumminartunik Kuupik allagarsivoq

- Sri Lankamiuuvunga nunalerinermik ilinniartitsisoq soraarneq, nunallu pillugu maani aviisimi atuareerlunga Kalaallit Nunaat annertunerusumik paasisaqarfigerusuppara.

Taamatut Naalakkersuisut siulittaasuannut Kuupik Kleistimut assaannarmik allakkani Neetha Mohotty-p aallartippai, tamatumalu kingorna allakkamini siunertani tikillugu: Nunatsinni allaffigisartagassaminik pissarsiornermini Kuupik Kleist ikiortiseraa.

Mohotty ilaatigut allappoq allaffigisartagassani 18 aamma 60 akornanni ukioqassasut. Arnaagunik angutaagunik apeqqutaanngilaq.

- Tuluit oqaluttualiatoqaat, meeqqanut aqaatit, atuakkiat pinerluttulersaarutit asanninnilersaarutillu nuannersumik naanillit atuartarlugillu katersugaraakka. Aamma Kalaallit Nunaat aammalu kalaallit eqqumiitsuliaat kusanartuliaallu annertunerusumik paasisaqarfigerusuppakka, Mohotty allappoq, neriorsuillunilu Sri Lankamit atuakkanik atuagassianillu nassiussisinnaalluni.

Neetha Mohottyp aamma Sri Lanka assamminik nunap assiliorsimavaa.

Allakkat inequnartut
Nunanut allanut Pisortaqarfimmi Siulittaasup Naalakkersuisoqarfiata ataani immikkut siunnersorti Allan Olsen allakkat uissuumminartut pillugit Sermitsiaq.AG-mut imatut nassuiaavoq:

- Nunarput pillugu, assersuutigalugu ilinniagaqartitsineq takornariaqarnerlu pillugit, apeqqutaasa ilai akissuteqarfiginialeruttorpavut. Kuupiup qinnuigisimavaanga allagai inequnartut akeqqullugit.

- Mohotty-p Sri Lankami aviisimi Kalaallit Nunaat pillugu oqaluttuaq atuarsimavaa, tassani srilankamiu Lawson Kotalawala, Nuummi najugalik, ilaanneeriarlunilu Sri Lankamut angalasartoq, apersorneqarsimalluni. Soorlulu silarsuarmi pissusissamisoornerpaatut Kuupimmut allappoq annertunerusumik paasisaqarsinnaanerluni allaffigisartagassaminillu pissarsisinnaanerluni, Allan Olsen oqaluttuarpoq.

Neetha Mohotty uunga attaveqarfigineqarsinnaavoq:

Ms. Neetha Mohotty
No. 7, Second Lane
C.A.M. Housing Scheme
Beddagana, South Pitakötte,
Kotte
Sri Lanka