Telep Nuuk Skynet erseqqissaavigaa

Tele Greenland naapertorlugu Nuuk Skynetip pisortaata oqaatigisaa, tassa Telep tunisassiornermi aki internettimik atuisunut akigitittaraa eqqortuunngilaq

Tele Greenland naapertorlugu Nuuk Skynetip pisortaanerata Tele internettimik atuisut tunisassiornermi akigititat pillugit oqaaserisai tunngavissaqanngillat. Assi: Leiff Josefsen

Tele Greenlandip maanna Nuuk Skynetip pisortaata Peter Engsig-Karup oqaatigisaa erseqqissaavigaa - taassuma namminersorlutik oqartussat oqarasuaateqarnikkut ingerlatsiviutaa pillugu pingasunngornermi paasissutissanik kukkusunik saqqummiussaqarnerarpaat.

Sermitsiaq.AG'mit apersorneqarluni Peter Engsig-Karup ilaatigut oqarpoq, 'Tele Greenlandilli iluani akit appasinnerit atorlugit naatsorsueriaaseqarpoq, Tele Greenlandip nammineq tunisassiornermimi akit Skynetimit akilerneqartussatut piumasarisaannit allaanerullutik'.

Oqaaseqaat taanna Telemit tunuartinneqarpoq:

- Oqariartuut eqqortuunngilaq. Uagut illup iluani nammineq tunisassiornermi aki taanna atorparput soorlu unammillertitta internettimik atuinerini akiliutaasartumut assingusoq, taannalu Oqarasuartarnermik nakkutilliisoqarfiup 2012-imi septembarip tallimaanni aalajangersugaavoq. Naatsorsueriaaseq taanna tunisassiatsinni Bredbånd Gold aamma Bredbånd Premium, akiisa allanngortiterneranni tunngavigineqarput, soorlu allaaserisami ”Nuuk Skynet: Telep unammillernissaa ajornarpoq”, sammineqartoq, Tele Greenlandimi tusagassiinermut pisortaaneq, Sæunn L. Nolsøe oqarpoq.

Powered by Labrador CMS