Unnuk kulturisiorfik: Assitoqqanik saqqummersitsineq
Ilulissani unnummi kulturisiorfimmi schweizimiut 1909-miit 1912-imut pingasoriarlutik ilisimasassarsiornerannit eqqumiitsulianik katersugaasivimmi assitoqqanik saqqummersitsineq ammarnersiorneqassaaq
Illoqarfiit nunaqarfiillu amerlasuut assigalugit Ilulissani aamma unnuk kulturisiorfik, arfininngornermi januaarip 26-anni ingerlanneqartussaq, piareersarneqarpoq.
Ilulissani Eqqumiitsulianik Katersugaasivimmi assitoqqat assammik qalipaasersukkat, schweizimiumit ujarassiuumit Arnold Heim-imit assilineqarsimasut saqqummersinneqassapput, taannalu Qeqertarsuarmut qeqertaasamullu Nuussuarmut 1909-mi ilisimasassarsiorsimavoq.
- Ilisimasassarsiornermi Arnold Heim pissutsit ajornakusoortut atorlugit 700-nik sinnilinnik assilisaqarsimavoq. Assit tamakkua ilarpaalui pitsaalluartuupput, tamatumalu saniatigut kulturip oqaluttuarisaanerani pingaaruteqarluarlutik, tassa asserpassuit ilaasa oqaluttuarimmagit kalaallit innuttaasut, atisaat inooriaasaallu, qallunaat nunasiallit illui kalaallillu ujaqqanik issunillu illui aasakkullu tupii, Ilulissanii Eqqumiitsulianik Katersugaasiviup pisortaa Ole Gamst-Pedersen oqaluttuarpoq.
Assit allat ukiunik 100-nik pisoqaassusillit
Tamanna peqatigingajallugu schweizimiu issittumik ilisimatooq silasiortortlu Alfred de Quervain Uummannap kangerluanut sermersuarmullu ilisimasassarsiorpoq. 1909-mi Quervain-ip ilisimasassarsiornerata immikkoortuani kingullermi Arnold Heim peqataavoq.
- 1912-mi Alfred de Quervain issittumi ilisimasassarsiortartunit siullersaalluni nunatta qeqqatigut sermersuaq kitaanit kangimut itivippaa. Ilisimasassarsiornermit tassannga aamma assammik qalipaasersukkanik asseqarpoq, Ole Gamst-Pedersen tusagassiorfinnut nalunaarummi allappoq.
Saqqummersitsinermi tunngaviupput Arnold Heimip assilisai oqaluttuarisaanikkut pingaarutillit, aammalu schweizimiut pingasoriarlutik ilisimasassarsiorneri pillugit atuakkiaq, ilisimasassarsiornerillu taakkua Kalaallit Nunaanni, Danmarkimi Schweizimilu puigorneqangajassimapput. Saqqummersitsineq katiterneqarpoq Alfred de Quervain-ip itiviineranit ukiut 100-unngornerat malunnartinniarlugu. Tamanna peqatigalugu kalaallinut ilisimaneqartunut ilisimaneqanngitsunullu, ilisimasassarsiornerni peqataasarsimasunut, nersorinninniutaavoq.
- Qularnanngitsumik ammaanersiornermi Uummannami børnehjemmermiut erinarsuutinik atuissapput, Ole Gamst-Pedersen oqarpoq.