NAPP nutaamik siulittaasutaarpoq
Lars Mathæussen, Nuummi aalisartut piniartullu peqatigiiffianni NAPP ukiuni kingullerni pingasuni siulittaasuusoq Vittus Nielsenimit taarserneqarpoq
68-inik ukiulik Vittus Nielsen Nuummi Aalisatut Piniartullu peqatigiiffianni NAPP siulittaasutut qinerneqarpoq.
Tamanna pivoq issatsiaq peqatigiiffiup ukiumoortumik ataatsimeersuartitsinerani, siulittaasunngorniarlutik unammisut marluk Vittus Nielsen aamma Gudmann Fleischerip akornanni.
Unammineq taanna Vittus Nielsenimit ajugaaffigineqarpoq taasinermik ataasinnarmik ajugaalluni.
- Vittus Nielsen, sooruna siulittaasunngorniarlutit sassartutit?
Ukiorpassuarni peqatigiiffimmut attuumassuteqarpunga siulittaasutut aamma siulersuisuni ilaasortatut. Maannakkut aalisarunnaarnikuugama siulittaasuunissannut NAPP'mullu sullissinissannut piffissaqarnerulerlunga. Siulersuisunik qanimut suleqateqarnissara qilanaaraara, siulittaasunngortoq Sermitsiaq.AG'mut oqarpoq.
Ajornartorsiutit annersaat
- NAPP'mi allannguinissannik pilersaaruteqarpit?
- Naagga, maannamut pilersaaruteqanngilanga. Kisianni soorunami ukiumut ataatsimeersuarnermi suliassiissutit tunniunneqartut suliarissavavut taamatuttaaq suliassiissutaasimasut ingerlaavartut aallutissallutigit. Ajornartorsiutit annerpaartaraat peqatigiiffiup ilaasortaanut sannaveqannginnatta aalisarnermut atortunik angallatinillu iluarsaassiffiusinnaasunik, Vittus Nielsen nassuiaavoq.
Aalisartut piniartullu peqatigiiffiat qanga sannaveqarnikuupput kommunit kattutinngikkallarmata kingornalu Kommuneqarfik Sermersuup sannavik Royal Greenlandimut tuninngikkallarmagu. Siulittaasunngortup neriuutigaa aappaagumiit sannavik nutaaq sananeqalissasoq.
Aqagu tallimanngornermi NAPP Nuummi katersortarfimmi ukiortaarsiortitsilluni nuannatsitsissaaq.