Singernikkut kalunneqartitsineq akisoqaaq

Pinerluttunik Isumaginnittoqarfimmit isumaqartoqarpoq pineqaatissiissutaasinnaasunik allanik nassaarniartoqarnera ajunngilluinnartoq, taamatuttaaq singernikkut kalunneqartitsisarneq.

- Pineqaatissiissutaasinnaasunik allanik ujartuineq ajunngilluinnarpoq aamma singernikkut kalunneqartitsineq taamatut pineqaatissinneqarsinnaasunut ajunngilluinnarpoq, Kalaallit Nunaanni Pinerluttunik Isumaginnittoqarfimmi pisortaagallartoq Michael Stage oqarpoq, kisianni taanna isumaqarpoq inuit ikittuinnaat taamannak pineqaatissinneqarsinnaasut.

- Assigiinngitsorpassuit inissinneqaqqaartariaqarput taamannak aaqqissuussinerup atorneqalinnginnerani. Inuit kikkut taamannak pineqaatissinneqarsinnaassanersut sinaakkusersorneqassaaq aamma suut atugassarititaassanerut. Danmarkimi singernikkut kalunneqarlutik pineqaatissinneqarsinnaasunut atugassarititaasut aaqqissuussapput, tamatuma saniatigut pineqaatissinneqarnermik nalaanni imigassamik atuiunnaarnissaq anguniarlugu katsorsarneqassapput aamma aalajangersimasumik inigisaat pineqaatissinneqarnissamut akuerisaassaaq, Michael Stage oqarpoq.

Akisussaaq
Taava apeqqutaalerpoq aaqqissuussineq taamaattoq nunatsinnut eqqutissallugu akissaqartinneqarnersoq, Michael Stage naapertorlugu suliniutissaavoq annertooq.

- Assigiinngitsorpassuit inisseqaarneqartariaqarput. Nakkutilliinissamut atortorpassuarnik pisariaqartitsisoqassaaq. Teknikki aaqqeqqaarsimassaaq inunnillu ulloq unnuarlu nakkutilliisussanik atorfinitsitsisoqassaaq. Mobilinut attaveqarfiit pinngitsooratik pitsaanerpaasariaqarput, pineqaatissinneqartoq angallavissani qaangerlugu pippat mobilit attaveqaataannit ungavarluni, takusinnaanavianngilarput pillagaq sumiinnersoq, Michael Stage oqarpoq nangillunilu, singernikkut kalunnerit kukkuneqalersinnaammata kalerriutaa aallartittoorsinnaalluni, naak pillagaq sumiiffissaq qaangerlugu ingerlasimanngikkaluartoq.

- Stationeqartariaqarpoq ulloq unnuarlu singernimikkut kalunneqarlutik pillakkanik nakkutilliisunik, kalerriutaallu aallartissagaluarpata ikinnerpaamik inuit marluk pillakkamik alakkaasussaallutik, taanna oqaluttuarpoq.

Piviusunngorsinnaavoq
- Piviusorsiornerua Siumut neriuppat singernikkut kalunneqartitsisarneq aappaagu atorneqalersinnaassasoq?

- Ajornanngilaq. Suut tamarmik anguneqarsinnaapput nukissaqaraanni - aningaasatigut inunnillu, MIchael Stage akivoq, taassumali qularaa taamaatut aaqqiinerup kinguneranik utaqqisut allattorsimaffiat appariarujussuassasoq, taanna naapertorlugu ikittuinnaat taamannak aaqqissuussineq aqqutigalugu pineqaatissinneqarnissamut naleqqutissammata.

Nunatsinni pineqaatissinneqarsimasunut isertitsivinnut utaqqisut inuit 250 missigaat.

- Nunatsinni isertitsivinni inissat amerlineqarnissaannik sulissuteqartoqalermalli utaqqisorparujussuit ikinnerulerput augullu naatsorsuutigaarput nunatsinni inissiisarfinni inissat amerlinerisigut utaqqisut ikiliartuinnassasut, taanna oqarpoq.

Singernikkut kalunnerit pillugit uani annermik atuagassaqarpoq.