Atuisartut akiliutitigut aningaasaajarneqarput
Aningaaserivimmi atuisut, sumiiffinni aningaasanik tigutsiseqanngitsumiittut, kontumiittuutimik takunerannut akileerujussuartinneqartarput
Nunami tamarmi nunaqarfinni illoqarfinnilu mikinerusuni amerlasuuni aningaaserivimmik atuisunut aningaasanik tigutsiveqanngilaq. Tamanna pissutigalugu pisiniarfiutileqatigiiffiup Pilersuisup aningaaserivimmik atuisut aullittarpai, pisiniarfiutileqatigiiffiup namminersorlutillu oqartussat isumaqatigiissutaat naapertorlugu, taannalu 2009-mi isumaqatigiissutigineqarpoq Grønlandsbanki suleqatigalugu.
Aaqqissuussineq tamanna pissutigalugu sumiiffinni mikinerusuni aningaaserivimmik atuisut taamaallaat Pilersuisumi aningaasanik tigusisinnaallutillu kontumut allamut nuussisinnaapput, tamannalu akikitsuunngilaq.
Atuaruk "Illoqarfinni qulingilluani aningaaseriviup sullissinera"
Akiliutit qaffasissut
Aningaasanik tigusiniaraanni, tamannalu sioqqullugu uninngasuutit apeqqutigigaanni, 43 koruuninik akeqarpoq.
Uninngasuutinik paasiniaaniinnaq 23 koruuneqarpoq tigusinerlu 20 koruuneqarluni, Pilersuisullu pisiniarfii aqqutigalugit akiligassat akilerniaraanni Fl-kortimut 35 koruuninik akiliisariaqarpoq.
- Ukialunni taamaassimavoq arlallillu sungiusimavaat. Ilaasali aamma maalaarutigisarpaat aperalutillu sooq taama akisutigissanersoq, Ittoqqortoormiini PIlersuisumi sulisoq oqarpoq.
Nettimi aningaaserivik
Akiliutinut aningaasanik sipaaruteqarusuttunut nettimi aningaaserivik aaqqiissutaasinnaavoq, ajoraluartumilli internetti akikitsutut aamma oqaatigineqarsinnaanngilaq.
Grønlandsbankimit nassuiaatigineqarpoq Sermitisaq.AG-p akiliutit pillugit Pilersuisoq oqaloqatigisariaqaraa, akiliutit Pilersuisup atugai aalajangersimannginnamigit.
Aaqqissuisoqarfiup Pilersuisup pisortaa Frederik Olsen akiliutit qaffasissut pillugit oqaluttuartinniaraluarpaa, paasitinneqarlunili aatsaat sisamanngorpat piffissaqalissasoq.