Tullissaa tassaasariaqarpoq flatrate

Ullumi Telemit tusarliussaq nuannersoq tassaavoq internettimik atuisunut akikilliliivigineqarneq tulliani flatratep atorsinnaalernissaa pisariaqarparput

Assi: Leiff Josefsen

Telemit tusarliunneqaqqammivoq ingerlatsiviup atuisuisa akiliutaat allanngunngikkaluarluni internettimik atuinerat annerulersinneqalersoq.

Ima isumaqarpiarpoq bredbånd-Goldimik imaluunniit bredbånd-Premiumimik atuisut februaarip aallaqqaataani akiliutaat allanngunngikkaluarlutik internettimik annermik atuisinnaalissasut.

Bredbåndimut assigiinngitsunut marlunnut akiliut taamaaginnaassaaq kisianni GB'mik annermik akiliuteqarnerunngikkaluarlutik pissarsisinnaalissasut.

Maannamuugallartoq allanik akikilliliissuteqassanngikkallarpoq
- Akinik apparsaassanerluta akikillisaassanerlutaluuniit periarfissat ataavartumik misissortarpavut. Maannakkut ammasumik ingerlatseriaaseqaleratta siunissamut pilersaarutivut saqqummiussuussinnaajunnaarpavut, Telemi attaveqaqatigiinnermut pisortaq Sæunn L. Nolsøe oqarpoq, aamma taassuma maannamut oqaatigisinnaanngilaa ingerlatsiviup isertitagaanut kaaviiaartitaanullu allannguineq qanoq sunniuteqassanersoq.

- Internettimik atueriaatsit marluk akiisa allanngortinnerisa qanoq sunniuteqarnissaat maannamut nalilissallugu nalunarpoq. Peqqaataanik naatsorsuutigaarput kaaviiaartitat apparnissaat, naatsorsuutigigatsigumi atuisartut amerlanerit akiligassamik aalajangersimasup qaangerlugu atuisarneri piunnaassasut, maannakkummi akilertakkaminnit marloriaammik pingasoriaammilluunniit annermik atuinerusinnaalermata. Atuisutta 40 procentiisa missaasa aaqqissuussinissaq nutaaq iluaqqutigissavaat. Kingullermik bredbåndimik atuinerup akikillisaavigineqarnerani kaaviiaartitatta ilarujussua annaavarput. Taamanermiilli kaaviiaartitat taamak qaffaqqitsiginngillat, Sæunn L. Nolsøe nassuiaavoq.

- Qaqugu flatrate atuutilissava?

- Maannamut tamanna oqaatigisinnaanngilara atuutilissappalli oqaatiginngitsoornaviarnagu, Sæunn L. Nolsøe oqarpoq.

Powered by Labrador CMS