Meeqqat paaqqinnittarfimmiissinnaanerat suli paatsuungassutaavoq

Inuit Ataqatigiit sinnerlugit Inatsisartunut ilaasortaq Olga P. Berthelsen neriuutigisamisut akissutisisimanavianngilaq.

Ilinniartitaanermut, Ilisimatusarnermut Nunanullu Avannarlernut suleqateqarnermut Naalakkersuisoq Palle Christiansen, D, aalajangiussamik oqaaseqarnermini Naalakkersuisut allannguinissamik pilersaaruteqannginnerarpaat, Danmarkimi ilinniagaqartut nunatsinnut uteraangamik meeqqanut paaqqinnittarfimmi inissaqartitsiniartarnerat pillugu.

Tamanna saqqummerpoq Olga P. Berthelsenip apeqquteqaatigimmagu kalaallit Danmarkimi ilinniagaqarlutik aallartartut Nunatsinnut uternerini, meeqqerivinni meeraasa inissaqartinneqarsinnaaneri qulakkeersinnaajumallugit Naalakkersuisut qanoq suliuteqarnersut.

Paarsivissarsinissaq qulakkeerneqanngilaq
- Ulloq manna tikillugu kikkulluunniit meeqqaminnik meeqqerivinni inissaqartitsisinnaanissaat siunertaralugu qulakkeerinnissimaarsinnaanissaat aaqqissuussamik aalajangersaaffigineqarsimanngilaq. Meeqqat atuarfii tikillugit meeqqerivinnut sanaartornissamut ingerlanneqarnerannullu apeqqut kommunit tamakkiisumik akisussaaffigaat, apeqqullugu pillugu Naalakkersuisut pilersaaruteqanngillat tamakkununnga aalajangersakkat allanngortinneqarsinnaanerat siunertaralugu, tamakkumi Namminersorlutik oqartussat akornanni nammaqatigiinnissamut isumaqatigiissutaani aalajangersaavigineqareersimammata, Palle Christiansen nassuiaavoq.

- Naak Naalkkersuisut tunngaviatigut aqqutissiuusseqataaffigerusukkaluaraat, meeqqat sumi najugaqarnerat ilaqutariissutsitigut il.il. inissisimanerat apeqqutaatinnagu ulluinnarni paaqqinnittarfinni inissaqartinniarneqartuartariaqartut, Naalakkersuisut pilersaarutiginngilaat innutaasut akornanni inuit aalajangersimasumik inissisimasut immikkut salliutinenqartalernissaat aqqutissiuutissallugit, Palle Christiansen oqarpoq.