Borgmesteri naalakkersuisunut: Akisussaaffik tigusiuk

Kommune Kujallermi borgmesteri Simon Simonsen qulimiguullip S-61-p atorunnaarneratigut kujataani silaannakkut angallannerup ajorseriarnera oqaaseqarfigaa. Naalakkersuisut kujataani silaannakkut angallannerup ajorseriarnera iliuuseqaqquai ukiup nikinnerani qulimiguulik S-61 Bell 212-mik taarsenqarmat.

- Ajornartorsiutit imaaginnavipput, taamaatiinnarnerit, kinguaattoornerit nassiussallu ajornartorsiutaajuarput. Neriorsorneqaraluarpugut qulimiguullit nutaat atorneqalerpata pissutsit allanngussanngitsut, piviusulli allaalluinnarput. Qulimiguullit angallassisinnaassusiat annikinneroqaaq paasinarsisimallunilu qulimiguulinnit pisoqqanit assorsuaq silamit sapernoqqajaanerujussuusut. Taamanernit inuppassuit sapernusaqattaalerput takorloorneqarsimanngikkaluartumillu Kujataa tamarmi angallannikkut anneroorujussuarmik sunnerneqarluni, Simon Simonsen oqarpoq.

Naalakkersuisut isertuapput
- Nuuk, Sisimiut imaluunniit Ilulissat qulimiguulinnit mikisunit taakkunannga qulingiluaannarnik ilaasoqarsinnaasunik nassiussanillu ikittuinnarnik nassataqarsinnaasunik sullinneqaleraluarpata ila qinikkat qassimmita pissutsit akuersaarsinnaannagit nilliassagaluarpat. Kujataali pineqarmat nuna tamakkerlugu qinikkat ikittuinnaat tutsiuttarput, Naalakkersuisullu Air Greenlandimut isumaqatigiissut kisiat patsisiliullugu toqqorterput, borgmesteri oqarpoq nangillunilu pissutsit taamaattut innuttaasunut, tikeraanut takornarianullu atugaritinneqarsinnaanngitsut.

Akisussaassuseqaritsi
Qaqortumi mittarfiliornissamik aalajangiineq aamma oqaaseqarfigaa.

- Sooq Naalakkersuisut Inatsisartullu akisussaaffimminnik tigusillutik mittarfiliornissamik aalajangiinianngillat? Ila mittarfik pillugu nalunaarusiat qassioqaat. Akerlianik Nuummi umiarsualivissaq eqqaaneqatsiaannarmat pissutsit pilertoqisumik ajornartorsiutitaqanngitsumillu ingerlapput, Kommune Kujallermi borgmesteri oqarpoq.

- Kujataata inuussutissarsiornikkut ineriartortussanngoraluarnera massakkut angallannikkut pissutsit pissutigalugit qatangiinnaratarsinnaavoq. Ilami kikkut aatsitassarsiornermut millionilikkaanik aningaasaliiumassagamik orninniakkamut apuunneq ajornarpat, Simon Simonsen aperaaq nangillunilu:

- Kujataa Naalakkersuisunit nunatta sinneranut sanilliullugu tunulliunneqartuaannarsinnaanngilaq.