Tasiilami innuttaasunik ataatsimiititsineq
Ilaqutariinnermut, ilagiinnut, kultureqarnermut naligiissitaanermullu naalakkersuisoq Mimi Karlsen, IA ulluni makkunani Tasiilamiittoq innuttaasunit naapinneqarnissamik periarfissiivoq
Mimi Karlsen maannakkut Tasiilamiippoq. Naalakkersuisunut ilaasortap Tasiilamiinnermini ulluni siullerni pulaarpai meeqqanut ulloq unnuarlu angerlarsimafik Prinsesse Margrethe Børnehjem aamma Tasiilami Katersugaasivik kiisalu sapaammi naalagiaqatigeereernerup kingornagut Ilagiit Siiniisaat ataatsimeeqatigalugit.
- Pulaakkakka assigiinngitsut pissarsiaqarfigilluarpakka. Prinsesse Margrethe Børnhjem-imi meeqqat isumagilluarneqarnerat isumalluarnarpoq. Ilagiit Sinniisaat ataatsimeeqatiginerini aamma paasinarpoq maani ilagiit isumagilluarneqartut. Katersugaasivimmi qulakkeerneqarsimavoq siuaasat kingornutassiaasa tammatsaalineqarnerat, Ilaqutariinnermut, Ilageeqarnermut, Kultureqarnermut Naligiissitaanermullu Naalakkersuisoq Mimi Karlsen oqarpoq, taanna marlunngornermi unnukkut katersortarfimmi innuttaasunik ataatsimiititsissaaq nal. 19.00-21.00.
Ulluni tulliuttuni Amarngivat, atuarfik aamma Utoqqaat illuat pulaarneqassapput.