Inger Bruun tunuarpoq
Københavnimi Kalaallit Illuutaanni pisortaq, Inger Bruun, tunuarnini siulersuisunut nalunaarutigeqqammerpaa atorfimminit tunuarniarluni naggammillu maajip 31-anni 2013 sulissalluni
- Apriilimi 67-inik ukioqalissaanga, inuuninnilu nutaamut nikeriaqqissaguma piffissanngorsoraa tunuarnissara. Oqarsinnaasoraanga illu ajunngitsoq qimassallugu.
Københavnimi Kalaallit Illuutaannit tusagassiivinnut nalunaarut taama nipeqarpoq, Inger Bruunip atorfini maajip 31-anni qimassavaa.
Inger Bruun Kalaallit Illuutaata ataani ukiuni 40-ngajanni sulisimavoq. Siunnersuinermik allaffimmi pisortatut 1973 aallartippoq, kingorna siullermik pisortamut tullersortinngorpoq 1997-imi illumi pisortaanertut atorfininnissani tikillugu.
- Illu ukiuni qaangiuttuni ineriartorfioqaaq. Illutaa nammineq allanngortiterneqarpoq aamma iluaniittut allanngoqaat. Tanngassimaarutigalugu oqaatigisinnaasarparput: "Danmarkimi Kalaallit Nunaata ilamernga", Inger Bruun erseqqissaavoq, taassuma illup assigiinngitsunut atorneqarneranik iluarusuutilik.
Siunnersuinermik allaffiup saniatigut - taanna Kalaallit Nunaata aamma Danmarkip akornanni ikaartarfittut nalilerneqartarpoq taamatuttaaq atuisut ataasiakkaat inuiaqatigiinni ingerlatsivinnut allanut aqqutigisarpaat, illumit pisortanut oqartussaasunut namminersortunullu suleqataalluarluarneq ingerlanneqarluni. Tamatuma saniatigut eqqaavai illumi sammisassaqartitsiviit ornittagarlu Qiperoq, Siunnersuinermik ingerlatsivik ILIK aamma utoqqarnut innarluutilinnullu pulaartartuunermik aaqqissuussat.