Kleist: Nunatta iluaniittut ataatsimoortumik tapiissutinit aniguisissinnaavaatigut
Uulia, gassi aatsitassallu nunatsinni periarfissaapput annertuut Danmarkimit ataatsimoortumik tapiissutinik isumalluuteqarunnaarnissamut. Taama oqarpoq naalakkersuisut siulittaasuat Kuupik Kleist
Naalakkersuisut siulittaasuat Kuupik Kleist isumaqarpoq nunarput sumiginnarneqassasoq suliniutit angisuut periarfissaqarallartillugu maannakkut aallartinneqanngippata.
Oqaatigaa nunarput aningaasaqarnikkut aalisakkat ataatsimoortumillu tapiissutit saniatigut allanik nappateqartariaqartoq, taakkumi ullumikkut ukiumut 3,2 milliard koruuniupput.
Taamatut oqariartuuteqarpoq Kuupik Kleist ataasinngormat Københavnimi tusagassiortunut nunanit allaneersunut 40-nut katersortitsimmat nunatta aatsitassanik piiaalernissami ineriartupiloornissaa paasissutissiissutiginiarlugu.
- Kalaaliusugut soqutigineqarnerujussuarput isumaalugineqarnerpullu nuannaarutigaarput, qallunaanit naalakkersuinermik suliaqartuniinnaanngitsoq aammali EU-mit. Nunanik aalajangersimasunik niueqarteqannginnissatsinnik toqqaannartumik kajumissaarneqarpugut, Kuupik Kleist oqarpoq.
Aamma naapertuuttutut isiginngilaa qallunaat aallartitarisartagaat ministeriunermik siuttoqarlutik Kinamut angalatillutik Kinamiut Danmarkimi qallunaallu Kinami aningaasaliinissaannik neqerooruteqarnarmata. Kleistip suna assigiinngissutaanersoq takujuminaatsippaa.
Kuupik Kleistip nuannarinngilaattaaq EU-mit tatineqarnini, tamannami qanittukkut pivoq EU-parlamentimi ataatsimiititaliamit taamatut saqqummiussiffigineqarami.
Tamannalumi tusagassiuutinik katersortitsinermi aamma eqqaavaa aperalunilu EU akissaqarnersoq Kinamiit aningaasaliissutinut naaggaarnissaminut.
- Nunatsinni aningaasaleerusuttut tamaasa ammaffigaavut. Pisoorsunngilagut inuuniarnermi atugassarititaasutigut atortulersuutitigullu annertusaanissarput pisariaqartillutigu. Pisuussutit soorlu uulia, gassi aatsitassalluu tamatumunnga aqqutaaqataasinnaapput, Kuupik Kleist oqarpoq.
Aamma erseqqissarpaa suliniutinut angisuunut inatsit nunanillu allaniit suliartortussanut atugassarititaasussat tuaviuunneqarsimanngitsut. Nassuerutigaali aamma nunatsinni suliassaqarfiit taamaattut aatsaat misilinneqalersut.
- Nunatsinni sulinissaminnut piumasaqaatitsinnik naammassinnissinnaasut tamaasa tikilluaqquagut, Kuupik Kleist oqarpoq, isumaqanngilarlu Kinamiorpassut tusindilikkaat nunatsinni suliartornissaat siooranartoqartoq.