Kuupik qanorluunniit oqaaseqarsinnaalluni
Det grønlandske Selskab ilaasortaminut unnussiuaartitsivoq Naalakkersuisut siulittaasuat Kuupik Kleist oqalugiartoralugu apeqqutigineqarsinnaallunilu
Geus'imi init Københavnimi Øster Voldgademiittut, Det grønlandske Selskabip ilaasortaanit ulikkaavipput. Naalakkersuisut siulittaasuat Kuupik Kleist, IA, oqaluttuarisaanermi naalakkersunngorsitseqqaarnerminnit aamma qinersiviup ukiua pillugu oqaluttuarpoq, qinersivik taanna juuni qaammat naammassissaaq.
Det grønlandske Selskabimi ilaasortat kingorna naalakkersuisut siulittaasuannut apeqquteqarsinnaapput. Socialismemiit akileraarutinut, nunallu tamalaat akornanni ingerlatsiviit akitsuusersorneqarsinnaat ilanngullugit siulittaasoq apersorneqarpoq.
Nuummi aqqusinerni kuulti kuuinnanngilaq turbaninillu atugaqanngilagut aamma Nuummi kinamiunik ulikkaanngilaq, Kuupik Kleist oqarpoq Kalaallit Nunaanni pissutsiusorisat tusaamasat atuutinngitsut oqaatigalugu.
Kalaallit Nunaanni akileraartarnermut politikki oqitsunnguuvoq, taamaattumik franksi isiginnaartitsisartoq Gerard Depardieu Frankrigimi akileraarutinut qaffaanermik piumasaqaatinik pinngitsoortitsiniarluni ullumi Belgiamut nuussisimasoq Kalaallit Nunaannut nuussinnaagaluarpoq, Kuupik Kleist quiasaarivoq.
- Gerard Depardieu Kalaallit Nunaannut nuussinnaagaluarpoq uagummi akileraartarnermut inatsisigut sakkukitsunnguupput, Naalakkersuisut siulittaasuat oqarpoq.
Peqquserluttoqartannginnera oqaatigaa
- Kalaallit Nunaat soqutigineqaqaaq, taamaattumik naalakkersuisut siulittaasuat qanoq akulikitsigisumik naalakkersuisut allat siulittaasuannit sianerfigineqartarpa?, tusarnaariat ilaasa paaserusuppaat.
- Naalakkersuisut allat siulittaasui siarnguttorsuunngillat suut tamarmik pisortatigoortumik ingerlanneqarput. Ilaatigut nunanit aallartitat akorniminni attaveqaqatigiinneq siulleq ingerlattarpaat. Ilaanni piffissaq sivisoorujussuaq ingerlareersoq ataatsimeeqateqartarpunga aatsaat, Naalakkersuisut siulittaasuat oqarpoq.
- Aningaasanik peqquserlunniartarneq qanoq oqaasissaqarfigaajuk?
- Uagut Naalakkersuisut ingerlatsivinnit angisuunit tunissutisinissarput mianersuuttorujussuuarput, issatsianngortoq Korea Kujallermiikkatta nunat marluk akornanni tunissutit nalinginnaasut pissarsiaavut, qilerniusat marluk koreamiullu tammajuitsussaliaat, nalinginnaasumik Naalakkersuisuni ilaasortat suliffeqarfinnit angisuunit tunissutisinissartik mianersuuppaat, Kuupik Kleist oqarpoq.