Sermersuarmi arsaanneq
Hinnerup HOG Oldboys arsaannermik nuannarisaqarluartuupput. Kisianni suliniutinut pitsaasunut tapersersuineq pineqartillugu siuttuupput. Marsimi Kalaallit Nunaaliassapput arsaannermi atortunik 1 million koruuninik nalilinnik nassataqarlutik, neriuutigaallu Kuupik aamma Binzer arsaateqatigisinnaassallugit.
2009-miit Ugandami, Rwandami Malimiu meeqqat inuusuttuaqqallu timersornermi atortunik atisanillu timersuutinik 3.365.000 koruuninik nalilinnik ikioreerlugit, Burundimi illunik 33-nik sanaartortitsereerlutik akiuussutissanillu 25.000-nik Røde Kors, ADRA Danmark aamma Unicef aqqutigalugit tunissuteqareerlutik Hinnerupimi angutit utoqqasaat HOG-meersut Kalaallit Nunaannut saapput.
Kalaallit Nunaannut marsip 14-iani tikissapput sermersuarmilu kikkut tamarmik qimusserlutik ornigassaanni katersuiniarneq siunertaralugu arsaannissamik neriuuteqarlutik. Kalaallit unammineqartussat akornanni "arsaqataasut" nuimasut arlallit qaaqquneqarsimapput.
Otto Motzfeldt www.inuusuk.gl-imik nittartagaatilik angalanermut najugaqarnermullu tunngasuni ikiuuttoq ilisimatitsilluni oqarpoq, qaaqqusissutinik nassinneqarsimasut ilaatigut tassaasut Julie Berthelsen, Minik Dahl Høegh, Ittu, Palle Christiansen, Nanook, borgmesterit pingasut, aamma qaaqqusissutinik ammasunik nassinneqarsimasut tassaasut naalakkersuisut siulittaasuat, Bank Nordikip Nuummi pisortaa kiisalu Air Greenlandip pisortaanera Michael Binzer.
- Neriuppugut aaqqissuussineq Kalaallit Nunaanni suliffeqarfinnit aningaasatigut tapersersorneqarumassasoq, Otto Motzfeldt aaqqissuussinermut "Kalaallit Nunaannut Juullimi Inuulluaqqusinerit"-nut aamma ussassaaruteqartoq oqarpoq, pineqartunut aallartitat ilaatigut tassaapput quiasaarisartoq Carsten Bang, arsaattartoq Ebbe Sand erinarsortartorlu Julie Berthelsen.
Arsaannermi atortut 1 million koruuninik nalillit HOG Hinnerupimit Kalaallit Nunaannut nassarneqartussat Kalaallit Nunaanni meeqqanut inuusuttuaqqanullu ajornartorsiortunut iluaqutissatut immikkoortitaapput.
- Arsaanneq aqqutigalugu Kalaallit Nunaanni meeqqanut inuusuttuaqqanullu arlalissuarnut sammisassaqartitseqataasinnaanissarput neriuutigaarput. Arsaq inunnik piorsarsimassuseq inuiaqatigiinnilu assigiinngissuseq qaangerlugit tamatigut ataatsimoortitsisinnaasarsimavoq, taamaattumik upperaarput arsaanneq Kalaallit Nunaanni meeqqanut inuusuttuaqqanullu ulluinnarni inuunermi isumalluarnermik pilersitseqataasinnaassasoq ukiukinnermilu ajornartorsiutit ilungersunartut ilaannut millisitseqataasinnaassasoq, HOG Hinnerup ilisimatitsivoq.
Suliniut tapersersorusukkaanni maanga saaffiginnittoqarsinnaavoq.